అమ్ముడవ్వాల్సిన ఇళ్లు 7.85 లక్షలు

32 నెలలు పట్టొచ్చు

8 ప్రధాన నగరాలపై ప్రాప్‌టైగర్‌ నివేదిక

దిల్లీ: దేశంలోని 8 ప్రధాన నగరాల్లో విక్రయమవ్వాల్సిన ఇళ్లు 7.85 లక్షల వరకు ఉంటాయని స్థిరాస్తి కన్సల్టెంట్‌ సంస్థ ప్రాప్‌టైగర్‌ తన నివేదికలో పేర్కొంది. ప్రస్తుత అమ్మకాల వేగాన్ని పరిగణనలోకి తీసుకుంటే.. ఈ ఇళ్లను అమ్మేందుకు స్థిరాస్తి సంస్థలకు సగటున 32 నెలల సమయం పడుతుందని తెలిపింది. దిల్లీ-ఎన్‌సీఆర్‌ ప్రాంతంలో అయితే 62 నెలల సమయం అవసరమని పేర్కొంది. ఆమ్రపాలి, జేపీ ఇన్‌ఫ్రాటెక్, యునిటెక్‌ లాంటి స్థిరాస్తి సంస్థలు కొనుగోలుదార్లకు ఇళ్ల అప్పగింతలో విఫలమవ్వడం.. దిల్లీ-ఎన్‌సీఆర్‌ స్థిరాస్తి విపణిపై ప్రతికూల ప్రభావం చూపిందని పేర్కొంది. ప్రాప్‌ టైగర్‌ సంస్థ 8 నగరాలు- అహ్మదాబాద్, దిల్లీ ఎన్‌సీఆర్, చెన్నై, బెంగళూరు, హైదరాబాద్, కోల్‌కతా, ముంబయి మెట్రోపాలిటన్‌ ప్రాంతం, పుణెల్లోని స్థిరాస్తి విపణిపై అధ్యయనం చేస్తుంటుంది. ఈ సంస్థ తాజాగా విడుదల చేసిన నివేదిక ప్రకారం..

* సెప్టెంబరు 30 నాటికి విక్రయమవ్వని ఇళ్లు/ఫ్లాట్ల సంఖ్య 7,85,260కు పెరిగింది. జూన్‌ చివరికి ఈ సంఖ్య 7,63,650గా ఉంది.

* ఈ ఏడాది జులై-సెప్టెంబరులో పై 8 నగరాల్లో గృహ విక్రయాలు 49 శాతం పెరిగి 83,220కు చేరాయి. గతేడాది ఇదే త్రైమాసికంలో ఈ సంఖ్య 55,910గా ఉంది.

* గృహాలకు గిరాకీ పుంజుకోవడంతో.. ఇళ్ల నిల్వలను విక్రయించేందుకు పట్టే సమయం తగ్గింది. 2021 మూడో త్రైమాసికంలో ఈ సమయం సగటున 44 నెలలుగా ఉండగా.. ఈ ఏడాది జులై-సెప్టెంబరులో 32 నెలలకు దిగివచ్చింది. కొవిడ్‌-19 రెండో దశ తర్వాత విక్రయాలు పుంజుకోవడం ఇందుకు తోడ్పడింది.

* నిల్వల విక్రయాన్ని పూర్తి చేసేందుకు పట్టే సమయం కోల్‌కతాలో అత్యంత తక్కువగా 24 నెలలుగా ఉంది.

* ఎనిమిది నగరాల్లో విక్రయం కాని ఇళ్లలో సుమారు 21 శాతం వరకు రెడీ-టు-మూవ్‌ విభాగంలో ఉన్నాయని పేర్కొంది.