సెంట్రల్‌ బ్యాంకుల రికార్డు పసిడి కొనుగోళ్లు

జులై- సెప్టెంబరులో 400 టన్నులు: డబ్ల్యూజీసీ

ముంబయి: ప్రపంచవ్యాప్తంగా వివిధ దేశాల కేంద్రీయ బ్యాంకులు (సెంట్రల్‌ బ్యాంకులు) జులై- సెప్టెంబరులో మొత్తంగా 400 టన్నుల పసిడిని కొనుగోలు చేశాయని ప్రపంచ స్వర్ణ మండలి (డబ్ల్యూజీసీ) తన నివేదికలో వెల్లడించింది. ఒక త్రైమాసికంలో ఇదే అత్యధిక కొనుగోళ్లు అని తెలిపింది. ఇప్పటివరకు 2018 జులై- సెప్టెంబరులో నమోదైన 241 టన్నులే రికార్డు స్థాయిగా ఉండేది. అయితే దీనికి ఇంచుమించు రెట్టింపు స్థాయిలో తాజా పసిడి కొనుగోళ్లు నమోదుకావడం గమనార్హం. అంతేకాకుండా ఈ ఏడాది ఏప్రిల్‌- జూన్‌లో కొనుగోలు చేసిన 180 టన్నుల కంటే ఇది చాలా ఎక్కువ అని తెలిపింది. దీంతో మొత్తంగా ఈ ఏడాదిలో నికరంగా 673 టన్నుల పసిడిని కేంద్రీయ బ్యాంకులు చేసినట్లయ్యిందని డబ్ల్యూజీసీ తెలిపింది. ప్రపంచవ్యాప్తంగా అధిక ద్రవ్యోల్బణం పరిస్థితులు నెలకొనడంతో.. పసిడిని హెడ్జింగ్‌ సాధనంగా ఉపయోగిస్తుండటం వల్ల పసిడికి గిరాకీ పెరిగిందని  తెలిపింది.