మెటా భారత అధిపతిగా సంధ్యా దేవనాథన్‌

దిల్లీ: మెటా ఇండియా వైస్‌ ప్రెసిడెంట్‌గా సంధ్యా దేవనాథన్‌ను నియమిస్తున్నట్లు సామాజిక మాధ్యమ దిగ్గజం మెటా గురువారం వెల్లడించింది. ఫేస్‌బుక్‌, ఇన్‌స్టాగ్రామ్‌, వాట్సప్‌ల మాతృ సంస్థ అయిన మెటా నుంచి ఇటీవల అజిత్‌ మోహన్‌ రాజీనామా చేసిన నేపథ్యంలో ఆ స్థానంలోకి సంధ్యను ఎంపిక చేశారు. ‘భారత్‌లో మా కొత్త నాయకురాలికి స్వాగతం చెప్పడం ఆనందంగా ఉంది. ఆమె నాయకత్వంలో భారత్‌లో మెటా వృద్ధి కొనసాగుతుంద’ని మెటా ముఖ్య వ్యాపార అధికారి మార్నే లెవిన్‌ వెల్లడించారు. సంధ్యా దేవనాథన్‌ 2016లో మెటాలో చేరారు. సింగపూర్‌, వియత్నాం వ్యాపారాలు, బృందాలతో పాటు ఆగ్నేయాసియాలో మెటా ఇ-కామర్స్‌ కార్యక్రమాల బాధ్యతలు చేపట్టారు. 2020లో ఇండోనేసియాకు వెళ్లి ఏపీఏసీ కోసం గేమింగ్‌ లీడ్‌గా పని చేస్తున్నారు. 2023 జనవరి 1 నుంచి ఆమె కొత్త బాధ్యతలు తీసుకుంటారని తెలుస్తోంది. మెటా ఏపీఏసీ వైస్‌ ప్రెసిడెంట్‌ డ్యాన్‌ నియరీ ఆధ్వర్యంలో ఆమె పనిచేయాల్సి ఉంటుంది.