ఎల్‌ అండ్‌ టీ కన్సార్షియమ్‌కు గ్రీన్‌కో గ్రూపు ప్రాజెక్టు కాంట్రాక్టు

ఈనాడు, హైదరాబాద్‌: పునరుత్పాదక ఇంధన వనరుల విభాగంలో కార్యకలాపాలు సాగిస్తున్న గ్రీన్‌కో గ్రూపు మధ్యప్రదేశ్‌లో నిర్మిస్తున్న గాంధీసాగర్‌ పంప్డ్‌ స్టోరేజ్‌ ప్రాజెక్టుకు సంబంధించిన సివిల్‌, హైడ్రోమెకానికల్‌ పనుల కాంట్రాక్టును ఎల్‌అండ్‌టీ కన్సార్షియం దక్కించుకుంది. ఈ కాంట్రాక్టును 30 నెలల వ్యవధిలో పూర్తిచేయాలి. దీని విలువ రూ.1,000-2,500 కోట్ల మధ్య ఉంటుంది. ఈ ప్రాజెక్టు మనదేశంలోని అతిపెద్ద క్లీన్‌ ఎనర్జీ ప్రాజెక్టుల్లో ఒకటి అవుతుందని ఎల్‌అండ్‌టీ తెలిపింది. కర్బన వ్యర్థాల నివారణలో మనదేశం మరో ముందడుగు వేయడానికి ఈ ప్రాజెక్టు దోహదపడుతుందని పేర్కొంది. ఇటువంటి ప్రాజెక్టుల్లో రెండు ఇంటర్‌-కనెక్టెడ్‌ రిజర్వాయర్లు నిర్మిస్తారు. విద్యుత్తుకు డిమాండ్‌ తక్కువగా ఉన్న సమయాల్లో నీటిని వృథా చేయకుండా ఎగువన ఉండే రిజర్వాయర్‌కు పంప్‌ చేస్తారు. విద్యుత్తుకు డిమాండ్‌ పెరిగినప్పుడు ఆ నీటిని దిగువకు విడుదల చేయడం ద్వారా అదనపు విద్యుత్తు ఉత్పత్తి చేస్తారు. తద్వారా 80 శాతానికి మించిన విద్యుదుత్పత్తి సామర్థ్యాన్ని సాధిస్తారు.