ఔషధ, వైద్య సేవల కంపెనీలదే అగ్రస్థానం

ఈనాడు, హైదరాబాద్‌: ‘బర్గండీ ప్రైవేట్‌ హురున్‌ ఇండియా 500’ కంపెనీల జాబితాలో తెలంగాణ నుంచి కార్యకలాపాలు సాగిస్తున్న 31 కంపెనీలకు స్థానం లభించింది. ఈ కంపెనీల సంస్థాగత విలువ దాదాపు రూ.5 లక్షల కోట్లుగా ఉంది. ఇందులో సగం వరకు ఔషధ, వైద్య సేవల రంగాల కంపెనీలే ఉన్నాయి. అత్యంత విలువైన కంపెనీగా దివీస్‌ లేబొరేటరీస్‌ ఈ జాబితాలో 41వ స్థానంలో నిలిచింది. తర్వాత స్థానాల్లో డాక్టర్‌ రెడ్డీస్‌, అరబిందో ఫార్మా ఉన్నాయి. అంకుర సంస్థ అయిన ‘డార్విన్‌బాక్స్‌’, దాదాపు రూ.8,300 కోట్ల విలువతో ఈ జాబితాలో చేరడం ఒక ప్రత్యేకత.

* స్టాక్‌మార్కెట్లో నమోదు కాని (అన్‌- లిస్టెడ్‌) కంపెనీలైన హెటిరో ల్యాబ్స్‌,  మేఘా ఇంజినీరింగ్‌, ఎంఎస్‌ఎన్‌ ల్యాబ్స్‌, దక్కన్‌ ఫైన్‌ కెమికల్స్‌. అరాజెన్‌ లైఫ్‌సైన్సెస్‌, బయొలాజికల్‌ ఇ.లిమిటెడ్‌, భారత్‌ బయోటెక్‌ ఇంటర్నేషనల్‌, మైహోమ్‌ కన్‌స్ట్రక్షన్‌, మేథా సర్వో డ్రైవ్స్‌.. తదితర సంస్థలు సైతం ఈ జాబితాలో స్థానం సంపాదించాయి.* ఐటీ రంగానికి చెందిన తన్లా ప్లాట్‌ఫామ్స్‌, సైయెంట్‌ లిమిటెడ్‌, వైద్య సేవల రంగంలోని కిమ్స్‌ హాస్పిటల్స్‌, రెయిన్‌బో చిల్డ్రన్స్‌ మెడికేర్‌లకూ ఇందులో స్థానం లభించింది.* తెలంగాణ నుంచి ఈ జాబితాలో ఉన్న కంపెనీల వార్షిక అమ్మకాల ఆదాయం రూ.1.8 లక్షల కోట్లకు పైగా ఉంది. దాదాపు 2.2 లక్షల మందికి ఉపాధి కల్పిస్తున్నాయి. దాదాపు 30 ఏళ్లుగా వ్యాపార కార్యకలాపాలు సాగిస్తున్న సంస్థలు ఇందులో ఉన్నాయి. * ‘టాప్‌-10 యువ కంపెనీల’ జాబితాలో తెలంగాణకు చెందిన ‘మెన్సా బ్రాండ్స్‌’ అనే సంస్థకు స్థానం దక్కింది.