మెర్సిడెస్‌-బెంజ్‌ నుంచి 7 సీట్ల ఎస్‌యూవీలు

ధరల శ్రేణి రూ.63.8-74.5 లక్షలు

దిల్లీ: విలాస కార్ల తయారీ సంస్థ మెర్సిడెస్‌ బెంజ్‌ మన దేశంలో 7 సీట్ల స్పోర్ట్స్‌ వినియోగ వాహనాలైన (ఎస్‌యూవీలు) జీఎల్‌బీ, ఈక్యూబీ మోడళ్లను విడుదల చేసింది.  వీటి ధరల శ్రేణి  రూ.63.8-74.5 లక్షలు (ఎక్స్‌-షోరూమ్‌). జీఎల్‌బీ శ్రేణిలోని 3 వేరియంట్ల ధరలు వరుసగా రూ.63.8 లక్షలు, రూ.66.8 లక్షలు, రూ.69.8 లక్షలు. పూర్తిస్థాయి విద్యుత్‌ ఈక్యూబీ 300 4మేటిక్‌ ధర రూ.74.5 లక్షలు. ‘ఈ ఎస్‌యూవీలు పెద్ద కుటుంబాలకు అవసరమైన అధిక స్థలాన్ని అందిస్తాయి. సీట్లు సౌకర్యంగా ఉండటంతో పాటు చిన్న పిల్లలు, పెంపుడు జంతువులకు రెండు సీట్లు అదనంగా ఉంటాయ’ని మెర్సిడెస్‌ బెంజ్‌ ఇండియా ఎండీ, సీఈఓ మార్టిన్‌ ష్వెంక్‌ వెల్లడించారు. తొలిసారిగా కంపెనీ మూడు పవర్‌ట్రెయిన్‌లలో (పెట్రోల్‌, డీజిల్‌, విద్యుత్‌) వాహనాలను అందిస్తోందని తెలిపారు. దేశ వ్యాప్తంగా 30 అల్ట్రా-ఫాస్ట్‌ (అత్యంత వేగవంతమైన) ఛార్జర్లను ఏర్పాటు చేశామని, ఈ ఏడాది ఆఖరుకు మరో 10 ఛార్జర్లను అందుబాటులోకి తెస్తామని ప్రకటించింది.