నిఫ్టీ-500 సంస్థల్లో 18% నారీశక్తి: ఐఐఏఎస్‌

దిల్లీ: కంపెనీల బోర్డుల్లో లింగ వైవిధ్యం నెమ్మదిగా పెరుగుతోందని ప్రాక్సీ అడ్వైజరీ సంస్థ ఇన్‌స్టిట్యూషనల్‌ ఇన్వెస్టర్‌ అడ్వైజరీ సర్వీసెస్‌ (ఐఐఏఎస్‌) నివేదిక వెల్లడించింది. ఎన్‌ఎస్‌ఈలో నమోదైన అగ్రశ్రేణి 500 కంపెనీల బోర్డుల్లో ఈ ఏడాది మార్చి నాటికి మహిళా డైరెక్టర్ల సంఖ్య 18 శాతానికి చేరినట్లు వెల్లడించింది. ‘కార్పొరేట్‌ ఇండియా: వుమెన్‌ ఆన్‌ బోర్డ్స్‌’ పేరుతో ఐఐఏఎస్‌ చేసిన అధ్యయనంలోని అంశాలు ఇలా..

* అంతర్జాతీయ స్థాయిలో కార్పొరేట్‌ బోర్డు రూముల్లో మహిళా ప్రాతినిధ్యం సరాసరిన 24 శాతానికి చేరింది. భారత్‌లోనూ కంపెనీ బోర్డుల్లో మహిళలకు ప్రాధాన్యం పెరుగుతోంది.
* భారత్‌లో 2014లో చూస్తే బోర్డుల్లో మహిళా డైరెక్టర్లు 6 శాతమే. 2019కి 14 శాతానికి చేరింది. ప్రస్తుతం నిఫ్టీ-500 కంపెనీల్లో మహిళా డైరెక్టర్ల వాటా 17.6 శాతానికి చేరింది.
* మహిళా డైరెక్టర్లు పెరుగుతున్నా, కొత్త నియామకాలు గత మూడేళ్ల నుంచి 1 శాతమే వృద్ధి చెందాయి. ప్రస్తుత పరిస్థితులను గమనిస్తే భారత్‌లో లింగ వైవిధ్యం 30 శాతం లక్ష్యానికి చేరడానికి 2058 వరకు వేచి చూడాల్సి ఉంటుంది.
* ఈ ఏడాది మార్చి ఆఖరుకు నిఫ్టీ-500 కంపెనీల్లో 4,694 మంది డైరెక్టర్లు ఉండగా, అందులో 827 మంది (17.6 శాతం) మహిళలు ఉన్నారు.
* అంతర్జాతీయ సరాసరి కంటే మెరుగ్గా ఐరోపా, ఉత్తర అమెరికాల్లో 34.4 శాతం, 28.6 శాతం చొప్పున మహిళా డైరెక్టర్లున్నారు. దేశం వారీగా చూస్తే ఫ్రాన్స్‌ 2021లో ఏకంగా 44.5 శాతం వాటాతో అగ్రస్థానంలో ఉంది.
* 2022 మార్చి 31 నాటికి నిఫ్టీ-500 కంపెనీల బోర్డుల్లో ఇద్దరు లేదా ముగ్గురు మహిళా డైరెక్టర్లు ఉన్న కంపెనీలు 48.6 శాతం ఉన్నాయి. 2021 మార్చి 31 నాటికి 45 శాతంగానే ఉన్నాయి. 2020 మార్చి 31 నాటికి 44 శాతంగా ఉన్నాయి.
* 159 కంపెనీల బోర్డుల్లో ఏకంగా 20 శాతం పైనే మహిళా డైరెక్టర్ల వాటా ఉంది. 2021లో ఈ సంఖ్య 146గా ఉంది.
* బోర్డుల్లో మహిళల సగటు వయసు 58.7 సంవత్సరాలుగా ఉంది. 2020లో సగటు వయసు 56 ఏళ్లు. పురుషుల సగటు వయసు 62.3 ఏళ్లు (2020లో వీరి సగటు వయసు 61 ఏళ్లు).
* బోర్డుల్లో మహిళలే ఛైర్‌పర్సన్లుగా ఉన్న నిఫ్టీ-500 కంపెనీలు 22. సీఈఓలుగా 25 మంది, ఎగ్జిక్యూటివ్‌ డైరెక్టర్ల హోదాలో 62 మంది ఉన్నారు.