TATA Motors: జనవరి నుంచి టాటా కార్ల ధరల పెంపు

దిల్లీ: వచ్చే నెల నుంచి కార్ల ధరలను పెంచే యోచనలో టాటా మోటార్స్‌ ఉంది. ఏప్రిల్‌ 2023 నుంచి కఠిన ఉద్గార నిబంధనలు అమల్లోకి రానున్న నేపథ్యంలో, వాటికి తగ్గట్లుగా తన కార్ల మోడళ్లను అభివృద్ధి చేసేందుకు అయ్యే వ్యయాన్ని దృష్టిలో ఉంచుకొని ఈ ధరలను పెంచుతున్నట్లు కంపెనీకి చెందిన ఓ ఉన్నతాధికారి వెల్లడించారు. అలాగే కమొడిటీల అధిక ధరల ప్రభావాన్ని తగ్గించుకునేందుకు కూడా ఈ ధరల సవరణ ఉపయోగపడుతుందని పీటీఐ వార్తా సంస్థకు టాటా మోటార్స్‌ మేనేజింగ్‌ డైరెక్టర్‌ (ప్రయాణికుల వాహనాలు, ఎలక్ట్రిక్‌ వాహనాలు) శైలేష్‌ చంద్ర తెలిపారు. మరోవైపు బ్యాటరీల ధరలు కూడా పెరిగాయని, ఇప్పటివరకు ఈ ప్రభావాన్ని కొనుగోలుదార్లకు బదిలీ చేయలేదనే విషయాన్ని ఆయన తెలిపారు. వీటన్నింటిని పరిగణనలోకి తీసుకొని ధరలను పెంచే అంశాన్ని పరిశీలిస్తున్నామని వివరించారు.