టెలికాం మౌలిక వసతుల రంగంలోకి మెటా

ఎయిర్‌టెల్‌తో కలిసి పెట్టుబడులు

దిల్లీ: సామాజిక మాధ్యమ దిగ్గజం మెటా ప్లాట్‌ఫామ్స్‌, దేశీయ టెలికాం దిగ్గజం ఎయిర్‌టెల్‌లు సంయుక్తంగా టెలికాం మౌలిక వసతుల రంగంలో పెట్టుబడులు పెట్టబోతున్నట్లు సోమవారం ప్రకటించాయి. దేశంలో అధిక వేగంతో కూడిన డేటా, డిజిటల్‌ సేవలకు పెరుగుతున్న గిరాకీని అందుకునేందుకు ఈ పెట్టుబడులు వినియోగిస్తామని తెలిపాయి. నెట్‌వర్క్‌లను నిర్మించడానికి సర్వీస్‌ ప్రొవైడర్లతో ఆదాయాన్ని పంచుకోవాలని టెలికాం ఆపరేటర్ల డిమాండ్‌ నేపథ్యంలో ఈ ప్రకటన వచ్చింది. ఎయిర్‌టెల్‌, మెటా సంయుక్తంగా అంతర్జాతీయ అనుసంధానిత మౌలిక వసతులు, సీపాస్‌ (కమ్యూనికేషన్స్‌ ప్లాట్‌ఫామ్‌ యాజ్‌ ఎ సర్వీస్‌) ఆధారిత కొత్త తరం డిజిటల్‌ పరిష్కారాలపై పెట్టుబడులు పెడుతున్నట్లు తెలిపాయి. దేశంలోని వర్థమాన వినియోగదార్లు, సంస్థల అవసరాలకు మద్దతు ఇవ్వడానికి దోహదం చేయనున్నట్లు పేర్కొన్నాయి. ఈ భాగస్వామ్యంలో భాగంగా మెటా, ఎస్‌టీసీ (సౌదీ టెలికాం కంపెనీ)లతో ఎయిర్‌టెల్‌ జట్టు కట్టనుంది. ప్రపంచంలోనే అత్యంత పొడవైన సబ్‌సీ కేబుల్‌ సిస్టమ్‌ 2ఆఫ్రికా పెరల్స్‌ను భారత్‌కు విస్తరించడానికి ఈ భాగస్వామ్యం దోహదం చేయనుంది. భారత్‌కు 2ఆఫ్రికా పెరల్స్‌ను విస్తరించాలనే ప్రణాళికను మెటా 2021 సెప్టెంబరులోనే ప్రకటించిన సంగతి విదితమే. ఎయిర్‌టెల్‌, మెటా కలిసి ఈ కేబుల్‌ను ఎయిర్‌టెల్‌ ల్యాండింగ్‌ స్టేషన్‌ ముంబయి వరకు విస్తరించనున్నాయి.