సీమెన్స్‌కు 1,200 విద్యుత్‌ రైలు ఇంజిన్ల తయారీ ఆర్డర్‌

దిల్లీ: ఇంజినీరింగ్‌ సంస్థ సీమెన్స్‌.. 9,000 హెచ్‌పీ సామర్థ్యంతో 1,200 విద్యుత్‌ లోకోమోటివ్స్‌ (రైలు ఇంజిన్ల) తయారీ ఆర్డరును దక్కించుకుంది. ఈ కాంట్రాక్టు విలువ రూ.20,000 కోట్లకు పైగానే. గుజరాత్‌లోని దాహోద్‌లో 9,000 హెచ్‌పీ లోకోమోటివ్స్‌ తయారీ, నిర్వహణ ప్రాజెక్టుకు భారతీయ రైల్వేలు ఈ ఏడాది ఏప్రిల్‌లో టెండర్లు ఆహ్వానించగా, సీమెన్స్‌ లిమిటెడ్‌ అతి తక్కువ ధరకు బిడ్‌ దాఖలు చేసి కాంట్రాక్ట్‌ దక్కించుకున్నట్లు బీఎస్‌ఈకి సమాచారమిచ్చింది. దాహోద్‌ ప్లాంట్‌లో 2023-24 నుంచి 2033-34 వరకు పదేళ్లలో ఈ 1,200 విద్యుత్‌ లోకోమోటివ్స్‌ను తయారు చేయనుంది. తొలి ఏడాది 5, రెండో ఏడాది 35, మూడు, నాలుగు ఏడాదుల్లో 80 చొప్పున, 5, 6 ఏడాదుల్లో 100 చొప్పున, ఆ తర్వాత అయిదేళ్ల పాటు ఏడాదికి 160 లోకోమోటివ్స్‌ చొప్పున సీమెన్స్‌ సరఫరా చేయనుంది. 10,000 మందికి ప్రత్యక్ష, పరోక్ష ఉపాధి అవకాశాలను ఈ ప్రాజెక్ట్‌ కల్పించబోతోంది.