సీట్‌బెల్ట్‌ లోపాలు సరిచేసేందుకు 9,125 కార్లు వెనక్కి: మారుతీ

దిల్లీ: మారుతీ సుజుకీ ఇండియా తన సియాజ్‌, బ్రెజా, ఎర్టిగా, ఎక్స్‌ఎల్‌6 మోడళ్లకు సంబంధించి 9,125 కార్లను వెనక్కి రప్పిస్తోంది. ముందు వరుస సీటు బెల్టు అడ్జస్టర్‌లో లోపాలను సరిదిద్దేందుకే ఈ కార్లను వెనక్కి రప్పిస్తున్నామని మంగళవారం కంపెనీ తెలిపింది. 2022 నవంబరు 2 నుంచి 28 మధ్య ఈ కార్లు తయారయ్యాయని పేర్కొంది. ఎలాంటి రుసుము లేకుండా ఉచితంగా మరమ్మతు చేసి ఇస్తామని పేర్కొంది. దీనికి సంబంధించి వాహన యజమానులకు కంపెనీ అధీకృత వర్క్‌షాప్‌ల నుంచి సమాచారం పంపిస్తున్నట్లు వివరించింది.

994 అర్బన్‌ క్రూయిజర్‌ హైరైడర్‌ వాహనాలు..  టయోటా: టయోటా కిర్లోస్కర్‌ మోటార్‌ ఈ ఏడాది జులైలో విడుదల చేసిన మధ్యతరహా స్పోర్ట్‌ వినియోగ వాహనం అర్బన్‌ క్రూయిజర్‌ హైరైడర్‌ మోడల్‌కు సంబంధించి 994 వాహనాలను వెనక్కి రప్పిస్తోంది. ముందు సీటు బెల్ట్‌ అడ్జస్టర్‌ ప్లేట్‌ లోపాన్ని సరిదిద్దేందుకు స్వచ్ఛందంగా ఈ వాహనాలను రీకాల్‌ చేస్తున్నట్లు కంపెనీ తెలిపింది. వినియోగదారుల భద్రత, సంతృప్తికి కంపెనీ కట్టుబడి ఉందని చెప్పడంలో భాగంగానే ఈ నిర్ణయం తీసుకున్నట్లు పేర్కొంది. సీటు బెల్టు లోపానికి సంబంధించి ఇప్పటివరకు ఎటువంటి ఫిర్యాదైతే తమకు అందలేదని వివరించింది.