2022-23లో వృద్ధి రేటు 7%: ఫిచ్‌

తదుపరి రెండేళ్లకు అంచనాల తగ్గింపు

దిల్లీ: భారత వృద్ధి రేటు అంచనాను ప్రస్తుత ఆర్థిక సంవత్సరానికి 7 శాతంగానే ఉంచుతున్నట్లు ఫిచ్‌ రేటింగ్స్‌ మంగళవారం వెల్లడించింది. వర్ధమాన మార్కెట్లలో అత్యంత వేగంగా వృద్ధి చెందుతున్న ఆర్థిక వ్యవస్థలో భారత్‌ ఒకటిగా నిలుస్తుందని తెలిపింది. అయితే తదుపరి రెండు ఆర్థిక సంవత్సరాల్లో (2023-24, 2024-25) భారత వృద్ధి రేటు అంచనాల్లో కోత విధించింది. 2023-24లో భారత జీడీపీ వృద్ధి 6.2 శాతం, 2024-25లో 6.9 శాతంగా నమోదు కావొచ్చని అంచనా వేసింది. సెప్టెంబరు నివేదిక ప్రకారం ఈ ఆర్థిక సంవత్సరానికి 7 శాతం వృద్ధి, 2023-24లో 6.7 శాతం, 2024-25లో 7.1 శాతం వృద్ధిని అంచనా వేసింది.

2023లో విండ్‌ఫాల్‌ పన్ను ఉండకపోవచ్చు: చమురు సంస్థలు ఆర్జిస్తున్న అదాటు (విండ్‌ఫాల్‌) లాభాలపై ప్రభుత్వం విధిస్తున్న విండ్‌ఫాల్‌ ట్యాక్స్‌ను 2023లో పూర్తిగా తొలగించే అవకాశం ఉందని ఫిచ్‌ అంచనా వేసింది. చమురు ధరలు అంతర్జాతీయంగా గతంలో ఉన్న స్థాయికి చేరడంతో అదాటు లాభాల పన్ను ప్రస్తావన ఉండకపోవచ్చని అభిప్రాయపడింది. రష్యా-ఉక్రెయిన్‌ యుద్ధ నేపథ్యంలో ఒక్కసారిగా పెరిగిన  చమురు ధరలకు అనుగుణంగా, దేశీయంగా ఉత్పత్తి చేస్తున్న ముడి చమురుపై అదాటు లాభాల పన్నును జులై 1 నుంచి కేంద్రం ప్రవేశపెట్టింది. ప్రతి 15 రోజులకు ఒకసారి ఈ పన్నును సమీక్షించి మార్పులు చేస్తోంది. తాజాగా చమురు ధరలు తగ్గుముఖం పట్టడంతో 2023 నుంచి విండ్‌ఫాల్‌ ట్యాక్స్‌ను విధించకపోవచ్చని ఏపీఏసీ చమురు-గ్యాస్‌ అవుట్‌లుక్‌ 2023 నివేదికలో అంచనా వేసింది.

* దేశీయంగా ఉత్పత్తి చేస్తున్న ముడి చమురు 15 శాతం దేశీయ అవసరాలను తీరుస్తోంది.