19న మౌలిక రంగానికి హామీ బాండ్ల బీమా ఉత్పత్తులు

విడుదల చేయనున్న రవాణా శాఖ

దిల్లీ: మౌలిక రంగానికి ద్రవ్యలభ్యత పెంచేందుకు దేశంలోనే తొలిసారిగా హామీ (ష్యూరిటీ) బాండ్ల బీమా ఉత్పత్తులను డిసెంబరు 19న రోడ్డు రవాణా, రహదారుల మంత్రిత్వ శాఖ విడుదల చేయనుందని మంత్రి నితిన్‌ గడ్కరీ తెలిపారు. వీటి వల్ల కాంట్రాక్టర్లకు గొప్ప ఉపశమనం లభిస్తుందని తెలిపారు. పరిశ్రమ సంఘాల సమాఖ్య (సీఐఐ) నిర్వహించిన ఓ కార్యక్రమంలో ఆయన ప్రసంగిస్తూ.. దేశంలో రహదారుల మౌలిక వసతులు శరవేగంగా అభివృద్ధి చెందుతున్నాయని పేర్కొన్నారు. హామీ బాండ్లు అనేవి కార్పొరేట్‌ బాండ్లు, ఫైనాన్షియల్‌ గ్యారెంటీలకు భిన్నమైనవి. ‘బ్యాంకు హామీల రూపంలో చిక్కుకొని పోయిన నిర్వహణ మూలధనాన్ని విడుదల చేసుకోవడం ద్వారా మౌలిక రంగంలో నిధుల లభ్యత పెరిగేందుకు హామీ బాండ్లు ఉపయోగపడతాయి. కాంట్రాక్టర్లు ఈ నిధులను వ్యాపార వృద్ధి అవసరాలకు ఉపయోగించుకోవచ్చ’ని మంత్రి గడ్కరీ తెలిపారు.