Vehicle insurance: కొత్త కార్లకు మూడేళ్లు.. ద్విచక్ర వాహనాలకు అయిదేళ్లు

మోటారు బీమా పాలసీ తీసుకునే అవకాశం
ఐఆర్‌డీఏఐ నూతన ప్రతిపాదనలు

ఈనాడు, హైదరాబాద్‌: మోటారు వాహన బీమా నిబంధనలు మారబోతున్నాయి. కొత్త కార్లకు మూడేళ్లు; ద్విచక్ర వాహనాలకు అయిదేళ్ల పాటు పూర్తిస్థాయి బీమా అందుబాటులోకి రానుంది. దీనికి సంబంధించి నూతన ప్రతిపాదనలను భారతీయ బీమా నియంత్రణ, అభివృద్ధి ప్రాధికార సంస్థ (ఐఆర్‌డీఏఐ)  రూపొందించింది. దీని ప్రకారం సాధారణ బీమా సంస్థలు, ఒకేసారి ప్రీమియం మొత్తాన్ని వసూలు చేసి, కార్లకు మూడేళ్ల పూర్తి స్థాయి బీమా పాలసీ జారీ చేయవచ్చు. అదే విధంగా ద్విచక్ర వాహనాలకు అయిదేళ్ల పూర్తిస్థాయి బీమా ఇచ్చే అవకాశం లభిస్తుంది. ఇప్పటి వరకూ కార్లకు మూడేళ్లు, ద్విచక్ర వాహనాలకు అయిదేళ్ల థర్డ్‌ పార్టీ బీమా పాలసీలనే బీమా కంపెనీలు జారీ చేస్తున్నాయి. ఒక ఏడాది మోటారు బీమా పాలసీలకు వర్తించే నో-క్లెయిమ్‌ బోనస్‌ (ఎన్‌సీబీ) సదుపాయాన్ని, దీర్ఘకాలిక మోటారు బీమా పాలసీలకు సైతం అమలు చేస్తారు.

ఇదేవిధంగా అగ్నిప్రమాద బీమా, గృహ బీమా నిబంధనలకు సంబంధించి కొన్ని కొత్త ప్రతిపాదనలను ఐఆర్‌డీఏఐ జారీ చేసింది. దీని ప్రకారం 30 ఏళ్ల కాలానికి గృహ బీమా తీసుకోవచ్చు. అదే విధంగా దీర్ఘకాలిక అగ్ని ప్రమాద బీమా పాలసీలను, ఆ పాలసీల కాలపరిమితి ముగిసే లోపు రద్దు చేసుకోవచ్చు.