సిమెంట్‌ వ్యాపారం నుంచి జేపీ గ్రూప్‌ నిష్క్రమణ

దాల్మియా సిమెంట్‌కు 9.4 మి.ట. ప్లాంట్ల విక్రయం
లావాదేవీ విలువ రూ.5,666 కోట్లు

దిల్లీ: సిమెంట్‌ వ్యాపారం నుంచి జేపీ గ్రూప్‌ నిష్క్రమించింది. 20 మిలియన్‌ టన్నుల సామర్థ్యం కలిగిన ప్లాంట్లను 2014-17 మధ్య ఆదిత్య బిర్లా గ్రూప్‌ సంస్థ అల్ట్రాటెక్‌ సిమెంట్‌కు విక్రయించగా, మిగిలిన 9.4 మిలియన్‌ టన్నుల సామర్థ్యం కలిగిన సిమెంట్‌ ప్లాంట్‌లను దాల్మియా భారత్‌కు విక్రయిస్తున్నట్లు జైప్రకాశ్‌ అసోసియేట్స్‌ (జేఏఎల్‌), గ్రూప్‌ సంస్థలు సోమవారం ప్రకటించాయి. ఈ లావాదేవీ ఎంటర్‌ప్రైజ్‌ విలువ రూ.5,666 కోట్లు. రుణభారం తగ్గించుకునే వ్యూహంలో భాగంగానే సిమెంట్‌ రంగం నుంచి జేపీ గ్రూప్‌ వైదొలిగింది.

దాల్మియా సిమెంట్‌ సామర్థ్యం 45.3 మి.ట.కు: పలు రాష్ట్రాల్లో జేపీ గ్రూప్‌ ప్రధాన సంస్థ జేఏఎల్‌, అనుబంధ సంస్థల నుంచి 9.4 మిలియన్‌ టన్నుల సామర్థ్యం కలిగిన సిమెంట్‌ ప్లాంట్లతో పాటు థర్మల్‌ ప్లాంట్‌ను దాల్మియా భారత్‌ కొనుగోలు చేయనుంది. ఈ కొనుగోలుతో దాల్మియా భారత్‌ వార్షిక సిమెంట్‌ తయారీ సామర్థ్యం 35.9 మిలియన్‌ టన్నుల నుంచి 45.3 మిలియన్‌ టన్నులకు చేరుతుంది. దేశంమొత్తం కార్యకలాపాలు సాగించే  కంపెనీగా ఎదగాలనుకుంటున్న దాల్మియా భారత్‌కు ఈ లావాదేవీ దోహదపడుతుంది. జేఏఎల్‌, అనుబంధ కంపెనీల నుంచి క్లింకర్‌, సిమెంట్‌, విద్యుత్‌ ప్లాంట్‌ల కొనుగోలుకు అనుబంధ సంస్థ దాల్మియా భారత్‌ సిమెంట్‌ బైండింగ్‌ ఒప్పందం కుదుర్చుకున్నట్లు దాల్మియా భారత్‌ ఎక్స్ఛేంజీలకు సమాచారమిచ్చింది. ఈ లావాదేవీలో 9.4 మిలియన్‌ టన్నుల సిమెంట్‌ తయారీ కేంద్రాలు, 6.7 మిలియన్‌ టన్నుల క్లింకర్‌, 280 మెగావాట్‌ థర్మల్‌ విద్యుత్‌ కేంద్రం కూడా భాగమే.

* ఈ కొనుగోలుతో దేశ మధ్య ప్రాంతంలోనూ దాల్మియా విస్తరించనుంది. జేఏఎల్‌ ఆస్తులు మధ్యప్రదేశ్‌, ఉత్తరప్రదేశ్‌, చత్తీస్‌గఢ్‌ల్లో ఉన్నాయి. 2026-27కు 75 మిలియన్‌ టన్నులు, 2030-31కు 110-130 మిలియన్‌ టన్నుల వార్షిక సిమెంట్‌ ఉత్పత్తి సామర్థ్యానికి విస్తరించాలన్న కంపెనీ లక్ష్యానికి దోహదపడనుంది.

* ప్రస్తుతం దేశంలో అల్ట్రాటెక్‌, అదానీ సిమెంట్‌ (ఏసీసీ, అంబుజా సిమెంట్‌ కొనుగోలు తర్వాత), శ్రీ సిమెంట్‌ తర్వాత నాలుగో అతిపెద్ద సిమెంట్‌ తయారీ సంస్థగా దాల్మియా సిమెంట్‌ ఉంది.

రుణాలు తగ్గించుకునేందుకే రుణ భారాన్ని తగ్గించుకునే ప్రక్రియలో భాగంగా 2014-17 మధ్య 20 మిలియన్‌ టన్నులకు పైగా తయారీ సామర్థ్యం కలిగిన ప్లాంట్‌లను అల్ట్రాటెక్‌ సిమెంట్‌కు జేఏఎల్‌ విక్రయించింది. 2015లో 2 మిలియన్‌ టన్నులకు పైగా సామర్థ్యం కలిగిన ప్లాంట్‌లలో నియంత్రణ వాటాను దాల్మియా గ్రూప్‌నకు జేపీ గ్రూప్‌ అమ్మేసింది.

* 2018 సెప్టెంబరులో జేఏఎల్‌పై ఐసీఐసీఐ బ్యాంక్‌ దివాలా పిటిషన్‌ దాఖలు చేసింది. ఈ ఏడాది సెప్టెంబరు నాటికి రూ.6893.15 కోట్లు వసూలు కావాల్సి ఉన్నందున, జేఏఎల్‌పై ఎన్‌సీఎల్‌టీలో ఎస్‌బీఐ కూడా ఫిర్యాదు చేసింది.