Jio phone 5G: త్వరలో జియో ఫోన్‌ 5జీ ఆవిష్కరణ

దిల్లీ: అందుబాటు ధరలో రిలయన్స్‌ జియో 5జీ ఫోన్‌ ఆవిష్కరణకు అడుగులు పడుతున్నాయని తెలుస్తోంది. 4జీబీ ర్యామ్‌, స్నాప్‌డ్రాగన్‌ 480+ ఎస్‌ఓసీ చిప్‌తో వస్తున్న ఈ ఫోన్‌.. బ్యూరో ఆఫ్‌ ఇండియన్‌ స్టాండర్డ్స్‌(బీఐఎస్‌) ధ్రువీకరణకు ఉన్న వస్తువుల జాబితాలో తాజాగా కనిపించింది. వివిధ అనుమతులు పొందుతున్న ఈ ఫోన్‌ను.. కంపెనీ త్వరలోనే ఆవిష్కరించే అవకాశం ఉందని అంచనా. గూగుల్‌ సాంకేతిక సాయంతో ఈ ఫోన్‌ను అభివృద్ధి చేస్తున్నట్లు రిలయన్స్‌ ప్రకటించిన సంగతి తెలిసిందే. ‘ఇండియా టుడే’ నివేదిక ప్రకారం.. ఈ ఫోన్‌ను రిలయన్స్‌ ఇండస్ట్రీస్‌ వచ్చే వార్షిక సాధారణ సమావేశం(ఏజీఎం)లో ఆవిష్కరించొచ్చు. అధికారికంగా ఇప్పటిదాకా ఈ ఫోన్‌ ఫీచర్లు బయటకు రాలేదు. గీక్‌బెంచ్‌ వెబ్‌సైట్‌లో ఈ మోడల్‌ నంబరును ఎల్‌ఎస్‌1654క్యూబీ5గా పేర్కొన్నారు. ఆండ్రాయిడ్‌ 12 ఓఎస్‌పై నడిచే ఈ ఫోన్‌ తెర 6.5 అంగుళాలు(హెచ్‌డీ+ఎల్‌సీడీ 90 హెర్ట్జ్‌) ఉండొచ్చు. బ్యాటరీ 5000 ఎమ్‌ఏహెచ్‌, వెనక వైపు రెండు 13 ఎమ్‌పీ కెమేరాలు, ముందు 8 ఎమ్‌పీ సెన్సార్‌ ఉండొచ్చని ఆ వార్తా సంస్థ పేర్కొంది. ధర అధికారికంగా తెలియకపోయినప్పటికీ.. రూ.8000-10,000 మధ్య ఉండొచ్చని.. మొత్తంమీద రూ.15,000 మించదని చెబుతున్నారు.