ఖరీదైనా పర్లేదు.. కొనేద్దాం

వాహన కొనుగోలులో మారుతున్న వినియోగదారుల వైఖరి: డెలాయిట్‌  

దిల్లీ: భారత వినియోగదారుల కొనుగోళ్ల వైఖరి మారుతోంది. ఒక పక్క ద్రవ్యోల్బణ భయాలు ఉన్నప్పటికీ.. కొత్త వాహన కొనుగోలు విషయంలో వెనక్కి తగ్గడం లేదు. ఖరీదు ఎక్కువైనా ముందడగు వేస్తున్నారు. రూ.10-25 లక్షల శ్రేణిలో వాహనాలకే అధిక శాతం వినియోగదారులు మొగ్గుచూపుతున్నట్లు డెలాయిట్‌ నివేదిక వెల్లడించింది. ఖర్చుతో పోలిస్తే కంపెనీ అనుభవానికే ఎక్కువ ప్రాధాన్యం ఇస్తుండటంతో కొనుగోలు ధోరణి మారడం స్పష్టమైందని తెలిపింది. కోరుకున్న వాహనం, మెరుగైన అనుభూతి కోసం 4-12 వారాల వరకు సుదీర్ఘ నిరీక్షణ సమయాన్ని సైతం అంగీకరిస్తున్నట్లు వివరించింది. డెలాయిట్‌ 2023 గ్లోబల్‌ ఆటోమోటివ్‌ కన్జూమర్‌ స్టడీ (జీఏసీఎస్‌) పేరిట నివేదికను వెలువరించింది. 2022 సెప్టెంబరు 21-29 మధ్య సర్వే నిర్వహించగా.. భారత్‌లో 1003 మంది కొనుగోలుదార్లు పాల్గొన్నారు.

నివేదికలోని అంశాలు..

* రూ.10-25 లక్షల శ్రేణిలో కార్లు కొనుగోలు చేసేందుకు దాదాపు 47 శాతం మంది మొగ్గుచూపుతున్నారు. రూ.10 లక్షల లోపు వాటికి 28 శాతం మంది ఇష్టపడుతున్నారు. రూ.10-25 శ్రేణిలో విద్యుత్‌ వాహనాలను కొనుగోలు చేయాలని దాదాపు 57 శాతం మంది భావిస్తుండగా, రూ.10 లక్షల లోపు వాటివైపు 20 శాతం మంది చూస్తున్నారు.

* ఇంతకు ముందు భారత వినియోగదారులు వాహన కొనుగోలు సమయంలో ధర, మైలేజీ వంటి అంశాలను పరిగణనలోకి తీసుకునేవారు. అయితే ఇప్పుడు వీటిని పట్టించుకోవడం లేదు.

* భారత వినియోగదారుల నుంచి గిరాకీ, అంచనాలు పెరగడాన్ని సర్వే స్పష్టం చేసింది. ఇకపై ధరలపై వినియోగదారులు ఆలోచించేలా లేరని డెలాయిట్‌ తౌచీ తోమిత్సు ఇండియా ఎల్‌ఎల్‌పీ పార్టనర్‌, ఆటోసెక్టర్‌ లీడర్‌ రాజీవ్‌ సింగ్‌ అన్నారు.

* ఒక బ్రాండ్‌ నుంచి మరో బ్రాండ్‌కు మారే సమయంలో ఉత్పత్తి నాణ్యత (62 శాతం), వాహన ఫీచర్లు (48 శాతం), బ్రాండ్‌ గుర్తింపు (46 శాతం) అంశాలను వినియోగదారులు పరిగణనలోకి తీసుకుంటున్నారు.

* తక్కువ ఇంధన వ్యయాలు, మెరుగైన డ్రైవింగ్‌ అనుభూతి, తక్కువ నిర్వహణ వంటి అంశాలు విద్యుత్‌ వాహనాల వైపు వినియోగదారులను నడిపిస్తున్నాయి.