స్థిరాస్తిలోకి రూ.64,000 కోట్ల పెట్టుబడులు

జీవన కాల గరిష్ఠానికి చేరిక
2022లో 32% పెరిగాయ్‌
సీబీఆర్‌ఈ దక్షిణాసియా నివేదిక

దిల్లీ: దేశంలో స్థిరాస్తి పెట్టుబడులు భారీగా ఊపందుకుంటున్నాయి. గత ఏడాది ఇవి జీవన కాల గరిష్ఠమైన 7.8 బిలియన్‌ డాలర్ల (సుమారు రూ.64,000 కోట్లు)కు చేరాయని కన్సల్టెన్సీ సంస్థ సీబీఆర్‌ఈ దక్షిణాసియా నివేదిక వెల్లడించింది. భారత స్థిరాస్తి పెట్టుబడులు 2022 అక్టోబరు-డిసెంబరులో 2.3 బి.డాలర్లుగా నమోదయ్యాయి. త్రైమాసిక ప్రాతిపదికన 64 శాతం, వార్షిక ప్రాతిపదికన 115 శాతం ఇవి పెరిగాయని ‘ఇండియా మార్కెట్‌ మానిటర్‌ 2022’ పేరుతో రూపొందించిన నివేదికలో సీబీఆర్‌ఈ తెలిపింది. దీని ప్రకారం..

* 2022లో మొత్తం స్థిరాస్తి పెట్టుబడుల పరిమాణంలో విదేశీ పెట్టుబడిదార్లు 57 శాతం వాటాతో ముందున్నారు. కెనడా నుంచి విదేశీ నిధులు 37 శాతం వచ్చాయి. అమెరికా నుంచి 15 శాతం పెట్టుబడులు దేశీయ స్థిరాస్తి రంగంలోకి తరలివచ్చాయి.

* దేశీయ పెట్టుబడిదార్ల నుంచి 40 శాతం పెట్టుబడులు వచ్చాయి.

* మొత్తం పెట్టుబడుల్లో సంస్థాగత మదుపర్ల వాటా 51 శాతంగా ఉంది. డెవలపర్లు 32 శాతం పెట్టుబడులు పెట్టారు.

* దిల్లీ-ఎన్‌సీఆర్‌లో పెట్టుబడి కార్యకలాపాలు ఎక్కువగా జరిగాయి. తర్వాత స్థానంలో ముంబయి ఉంది. ఈ రెండు నగరాలు కలిపి 56 శాతం పెట్టుబడుల్ని ఆకర్షించాయి.

* భూమి, డెవలప్‌మెంట్‌ సైట్లలోకి అధికంగా 48 శాతం పెట్టుబడులు వచ్చాయి. కార్యాలయ విభాగంలోకి 35 శాతం నిధులు వచ్చాయి.

* ఇళ్ల నిర్మాణం/అభివృద్ధి కోసం స్థలం/భూమి కొనుగోలు కోసం 44 శాతం నిధులు వెచ్చించారు. మిశ్రమ వినియోగ డెవలప్‌మెంట్‌ కోసం 25 శాతం నిధులు చొప్పించారు.

* ‘స్థిరాస్తి రంగంలోకి రికార్డు స్థాయిలో పెట్టుబడులు తరలి రావడం విశేషం. భారత స్థిరాస్తి రంగంలో వృద్ధికి ఉన్న అవకాశాలను ఇది సూచిస్తోంద’ని సీబీఆర్‌ఈ (ఇండియా, ఆగ్నేయాసియా, మధ్య ప్రాచ్యం, ఆఫ్రికా) ఛైర్మన్‌, సీఈఓ అన్షుమాన్‌ మాగజైన్‌ వెల్లడించారు.