89% మంది చిన్న మదుపర్లకు నష్టాలే

ఈక్విటీ ఎఫ్‌&ఓ ట్రేడింగ్‌పై సెబీ అధ్యయనం

దిల్లీ: గత ఆర్థిక సంవత్సరం (2021-22)లో ఈక్విటీ ఫ్యూచర్స్‌, ఆప్షన్ల (ఎఫ్‌&ఓ) విభాగంలో ట్రేడ్‌ చేసిన చిన్న మదుపర్లలో 89 శాతం మంది నష్టాలనే చవిచూశారని సెబీ అధ్యయనం వెల్లడించింది. అంటే ప్రతి 10 మందిలో తొమ్మిది మందికి నష్టాలేనన్నమాట. ఈ విషయాన్ని పరిగణనలోకి తీసుకుని.. నష్టముప్పు నివారణకు సంబంధించి బ్రోకర్లు, ఎక్స్ఛేంజీలు చేపట్టాల్సిన అదనపు చర్యలపై త్వరలోనే మార్గదర్శకాలు విడుదల చేస్తామని సెబీ పేర్కొంది. ఎప్పటికప్పుడు మదుపర్ల లాభ/నష్ట వివరాలను విశ్లేషించి, వెల్లడించడం ద్వారా.. మార్కెట్‌లో ఉన్న ముప్పుపై వాళ్లలో అవగాహన  మరింత పెంచే అవకాశం ఉంటుందని సెబీ పేర్కొంది. కొవిడ్‌-19 ముందు ఆర్థిక సంవత్సరమైన 2018-19; కొవిడ్‌-19 పరిణామాల తదుపరి సంవత్సరమైన 2021-22లలో ఈక్విటీ ఎఫ్‌ఖీఓ విభాగంలో చిన్న మదుపర్లకు నికరంగా వచ్చిన లాభం లేదా నష్టం ఆధారంగా సెబీ ఈ అధ్యయనాన్ని నిర్వహించింది. ఇందుకోసం అత్యుత్తమ 10 మంది స్టాక్‌ బ్రోకర్లకు చెందిన మదుపర్ల ట్రేడింగ్‌ను పరిగణనలోకి తీసుకుంది. ఈ అధ్యయనం ప్రకారం..

* 2021-22లో ఈక్విటీ ఎఫ్‌ఖీఓలో 89 శాతం మంది చిన్న మదుపర్లు నష్టపోయారు. సగటున ఒక్కొక్కరి నష్టం రూ.1.1 లక్షలు. బాగా క్రియాశీలకంగా ఉండే ట్రేడర్లలో 90 శాతం మంది సగటున రూ.1.25 లక్షలు పోగొట్టుకున్నారు.

* కేవలం 11 శాతం మందే లాభాలు ఆర్జించారు. వీరి సగటు లాభం రూ.1.5 లక్షలు. క్రియాశీలకంగా ట్రేడ్‌ చేసే వారి విషయానికొస్తే.. లాభాలొచ్చిన వాళ్లు 10 శాతం మంది ఉండగా, సగటు లాభం రూ.1.9 లక్షలు.

* అత్యుత్తమ 10 బ్రోకరేజీ సంస్థల వద్ద ఈక్విటీ ఎఫ్‌ఖీఓ విభాగంలో ట్రేడ్‌ చేస్తున్న చిన్న మదుపర్ల సంఖ్య 2021-22లో 45.2 లక్షలుగా ఉంది. 2018-19లోని 7.1 లక్షల మందితో పోలిస్తే ఈ సంఖ్య 6 రెట్లకు పైగా పెరిగింది.  

* ట్రేడింగ్‌ చేసే చిన్న మదుపర్లలో 30-40 ఏళ్ల వయస్సున్న వాళ్లే ఎక్కువ మంది. మొత్తం సంఖ్యలో వీళ్లు 39 శాతం. ఇక 20-30 ఏళ్ల వయస్సున్న వాళ్లు 36 శాతం మంది ఉంటారు. 2018-19లో వీళ్లు 11 శాతమే.

* 2018-19లోను, 2021-22లోనూ ఈక్విటీ ఎఫ్‌ఖీఓ ట్రేడింగ్‌ చేస్తున్న వాళ్లలో మగవాళ్లే ఎక్కువ (80%).

* 2021-22లో ఆప్షన్లలో ట్రేడ్‌ చేసిన చిన్న మదుపర్లు 98 శాతం మంది కాగా.. ఫ్యూచర్లలో ట్రేడ్‌ చేసిన వాళ్లు 11 శాతం మంది. 2018-19లో ఆప్షన్ల ట్రేడర్లు 89%, ఫ్యూచర్ల ట్రేడర్లు 43 శాతంగా ఉన్నారు.