ప్రపంచ అతి పెద్ద డెరివేటివ్స్‌ ఎక్స్ఛేంజీగా ఎన్‌ఎస్‌ఈ

వరుసగా నాలుగో ఏడాదీ..

దిల్లీ: నేషనల్‌ స్టాక్‌ ఎక్స్ఛేంజీ ఆఫ్‌ ఇండియా (ఎన్‌ఎస్‌ఈ) వరుసగా నాలుగో ఏడాదీ ప్రపంచంలోనే అతి పెద్ద డెరివేటివ్స్‌ ఎక్స్ఛేంజీగా నిలిచింది. 2022లో ట్రేడయిన మొత్తం డెరివేటివ్‌ కాంట్రాక్టుల సంఖ్య ఆధారంగా ఫ్యూచర్స్‌ ఇండస్ట్రీ అసోసియేషన్‌ (ఎఫ్‌ఐఏ) ఈ ర్యాంకుల్ని ఇస్తుందని ఎన్‌ఎస్‌ఈ తెలిపింది. ఈక్విటీ విభాగంలోనూ ట్రేడ్ల సంఖ్య (ఎలక్ట్రానిక్‌ ఆర్డర్‌ బుక్‌) ఆధారంగా 2022లో ఎన్‌ఎస్‌ఈకి మూడో స్థానం లభించింది. గత ఏడాది మూడో స్థానంలో ఉండగా ఒక స్థానం మెరుగుపడింది. వరల్డ్‌ ఫెడరేషన్‌ ఆఫ్‌ ఎక్స్ఛేంజీస్‌ (డబ్ల్యూఎఫ్‌ఈ) ఈ గణాంకాలను నిర్వహిస్తుంటుంది. 2022 క్యాలెండర్‌ ఏడాదిలో నిఫ్టీ 50 జీవన కాల గరిష్ఠమైన 18,887.60 పాయింట్లను తాకింది.

* ఈక్విటీ విభాగంలో ఈటీఎఫ్‌ల్లో (ఎక్స్ఛేంజీ ట్రేడెడ్‌ ఫండ్స్‌) రోజువారీ సరాసరి టర్నోవర్‌ రూ.470 కోట్లుగా నమోదైంది. వార్షిక ప్రాతిపదికన 51 శాతం వృద్ధి చెందింది.

* సార్వభౌమ పసిడి బాండ్ల రోజువారీ సరాసరి టర్నోవర్‌ (సెకండరీ మార్కెట్‌లో) రూ.7 కోట్లుగా నమోదైంది. 59 శాతం వృద్ధి లభించింది.

* ప్రభుత్వ సెక్యూరిటీల రోజువారీ సరాసరి టర్నోవర్‌ గత నెలలో రూ.3 కోట్లకు చేరింది.* ఈక్విటీ విభాగంలో మూడో స్థానం, డెరివేటివ్స్‌ విభాగంలో అతి పెద్ద ఎక్స్ఛేంజీగా అవతరించడం వాటాదార్లందరి సహకారంతోనే సాధ్యమైందని ఎన్‌ఎస్‌ఈ హెడ్‌ ఆఫ్‌ బిజినెస్‌ డెవలప్‌మెంట్‌ శ్రీరామ్‌ కృష్ణన్‌ వెల్లడించారు.

* నియంత్రణ సంస్థల నుంచి అనుమతులు రాగానే సామాజిక స్టాక్‌ ఎక్స్ఛేంజీను కూడా ఒక విభాగంగా త్వరలోనే ప్రారంభిస్తామని ఎన్‌ఎస్‌ఈ వెల్లడించింది.