సన్‌ ఫార్మా లాభం రూ.2,166 కోట్లు

మధ్యంతర డివిడెండ్‌ రూ.7.50

దిల్లీ: సన్‌ ఫార్మా డిసెంబరు త్రైమాసికంలో రూ.2,166 కోట్ల ఏకీకృత నికర లాభాన్ని నమోదు చేసింది. 2021-22 ఇదేకాల లాభం రూ.2,059 కోట్లతో పోలిస్తే ఇది 5 శాతం ఎక్కువ. కార్యకలాపాల మొత్తం ఆదాయం రూ.9,863 కోట్ల నుంచి రూ.11,241 కోట్లకు పెరిగింది. భారత ఫార్ములేషన్‌ విక్రయాలు 7 శాతం పెరిగి రూ.3,392 కోట్లకు చేరాయి. యూఎస్‌ ఫార్ములేషన్‌ విక్రయాలు 6 శాతం పెరిగి 422 మిలియన్‌ డాలర్ల (సుమారు రూ.3,400 కోట్లు)కు చేరాయి. ‘సన్‌ ఫార్మా వృద్ధిలో కీలకమైన స్పెషాల్టీ వ్యాపారాన్ని విస్తరించేందుకు, థెరపీ విభాగాల్లో పెట్టుబడులు పెడుతున్నాం. అమెరికాకు చెందిన కన్సర్ట్‌ ఫార్మా కొనుగోలు కూడా ఈ దిశగా వేసిన అడుగే’ అని సన్‌ ఫార్మా మేనేజింగ్‌ డైరెక్టర్‌ దిలీప్‌ సంఘ్వి వెల్లడించారు. రూ.1 ముఖ విలువ కలిగిన ఒక్కో షేరుకు రూ.7.50 చొప్పున మధ్యంతర డివిడెండును చెల్లించేందుకు కంపెనీ డైరెక్టర్ల బోర్డు ఆమోదం తెలిపింది.

* బీఎస్‌ఈలో షేరు 1.51 శాతం నష్టపోయి రూ.1,035 వద్ద ముగిసింది.