సుబ్రతా రాయ్‌ బ్యాంకు ఖాతాల అటాచ్‌మెంట్‌

సెబీ ఆదేశాలు

దిల్లీ: సహారా గ్రూప్‌ అధిపతి సుబ్రతా రాయ్‌, మరో ముగ్గురికి చెందిన బ్యాంకు-డీమ్యాట్‌ల ఖాతాలను అటాచ్‌ చేయాలంటూ మార్కెట్‌ నియంత్రణాధికార సంస్థ సెబీ ఆదేశాలు జారీ చేసింది. గ్రూప్‌నకు చెందిన రెండు సంస్థలు డిబెంచర్ల (ఓఎఫ్‌సీడీ) జారీలో నియంత్రణ నిబంధనలను ఉల్లంఘించిననందుకు గాను విధించిన రూ.6.48 కోట్ల అపరాధ రుసుమును రికవరీ చేయడం కోసం ఈ నిర్ణయం తీసుకుంది. దీంతో సుబ్రతా రాయ్‌తో పాటు అశోక్‌ రాయ్‌ఛౌదరి, రవి శంకర్‌ దూబే, వందన భార్గవకు చెందిన బ్యాంకు, డీమ్యాట్‌ ఖాతాలను అటాచ్‌ చేయనున్నారు. ఈ నలుగురి అన్ని ఖాతాలను (లాకర్లు సహా) అటాచ్‌ చేయాలని సెబీ పేర్కొంది. వీరి ఖాతాల నుంచి ఎటువంటి ఉపసంహరణలు జరగరాదని అన్ని బ్యాంకులు, డిపాజిటరీలు, మ్యూచువల్‌ ఫండ్‌లకు ఆదేశాలు జారీ చేశారు. అయితే ఆయా ఖాతాల్లో జమలకు మాత్రం అనుమతినిచ్చారు.