తనఖా షేర్లకు రూ.9,200 కోట్లు చెల్లిస్తాం

ముందస్తుగా విడిపిస్తాం: అదానీ గ్రూపు

దిల్లీ: వచ్చే ఏడాది సెప్టెంబరుతో గడువు తీరిపోయే తనఖా షేర్లను ముందస్తుగా విడిపించేందుకు సుమారు రూ.9,200 కోట్లు (1,114 మి.డాలర్లు) చెల్లించనున్నట్లు అదానీ గ్రూపు తెలిపింది. ఈ షేర్లు అదానీ పోర్ట్స్‌, అదానీ గ్రీన్‌ ఎనర్జీ, అదానీ ట్రాన్స్‌మిషన్‌లకు చెందినవని పేర్కొంది. మార్కెట్‌లో ఇటీవలి ఒడుదొడుకులను దృష్టిలో ఉంచుకొని తాజా చర్యలను చేపట్టినట్లు అదానీ గ్రూపు తెలిపింది. తనఖా షేర్లను తగ్గించుకోవడానికి ప్రమోటర్లు కట్టుబడి ఉన్నారని చెప్పడానికి ఇది నిదర్శనమని  తెలిపింది.

మహారాష్ట్ర ప్రభుత్వం సలహాదారు కమిటీలో కరన్‌ అదానీ, అనంత్‌ అంబానీ

మహారాష్ట్ర ప్రభుత్వానికి, ఆర్థిక, ఇతరత్రా అంశాలపై సలహాలు ఇచ్చే కమిటీలో కరన్‌ అదానీ, అనంత్‌ అంబానీలు సభ్యులుగా ఉండనున్నారు. 21 మంది సభ్యులుండే ఈ కమిటీకి టాటా సన్స్‌ ఛైర్మన్‌ ఎన్‌.చంద్రశేఖరన్‌ సారథ్యం వహిస్తారు. గౌతమ్‌ అదానీ కుమారుడైన కరన్‌ అదానీ.. అదానీ పోర్ట్స్‌ అండ్‌ సెజ్‌కు సీఈఓగా బాధ్యతలు నిర్వహిస్తున్నారు. ముకేశ్‌ అంబానీ తనయుడు అనంత్‌ అంబానీ రిలయన్స్‌ ఇండస్ట్రీస్‌కు ఎగ్జిక్యూటివ్‌ డైరెక్టరుగా ఉన్నారు.