ఎల్ అండ్‌ టీకి రక్షణ శాఖ నుంచి భారీ ఆర్డరు

దిల్లీ: లార్సెన్‌ అండ్‌ టుబ్రో(ఎల్‌ అండ్‌ టీ)కి భారత రక్షణ శాఖ నుంచి భారీ ఆర్డరు లభించింది. దేశీయంగా 41 మాడ్యులర్‌ వంతెనలను, తయారు చేసి, అందించేందుకు ఎల్‌ అండ్‌ టీ కంపెనీతో రూ.2,585 కోట్ల కాంట్రాక్టును రక్షణ శాఖ కుదుర్చుకుంది. ఈ వంతెనలను విడివిడి భాగాలు(మాడ్యూళ్లు)గా రూపొందిస్తారు. తద్వారా క్షేత్ర స్థాయిలో వేగంగా వంతెనగా నిర్మించడానికి వీలవుతుంది. వీటిని డీఆర్‌డీఓ డిజైన్‌ చేసి, అభివృద్ధి పరచగా.. ఎల్‌ అండ్‌ టీ  తయారు చేస్తుందని మంత్రిత్వ శాఖ ఒక ప్రకటనలో పేర్కొంది. భారత సైనిక దళంలో ఈ వంతెనలను ఉపయోగించనున్నారు. ప్రతి వంతెన 46 మీటర్ల పొడవునా తయారు చేయొచ్చు. కాల్వలు, పెద్ద కందకాలున్న చోట కూడా ఈ వంతెనలను వేగంగా అమర్చుకోవచ్చు.