Higher pension: అందుబాటులోకి అధిక పింఛను ఆన్‌లైన్‌ దరఖాస్తు.. మే 3 వరకు గడువు

ఆదివారం అర్ధరాత్రి ‘ఉమ్మడి ఆప్షన్‌’ లింక్‌ ఇచ్చిన ఈపీఎఫ్‌వో

ఈనాడు, హైదరాబాద్‌: సుప్రీంకోర్టు తీర్పు మేరకు ఈపీఎఫ్‌ పరిధిలోకి వచ్చే అర్హులైన ఉద్యోగులు, కార్మికులు, పింఛనుదారులు అధిక పింఛను పొందేందుకు యజమానితో కలిసి ఉమ్మడి ఆప్షన్‌ ఇచ్చేందుకు ఈపీఎఫ్‌వో ఆన్‌లైన్లో దరఖాస్తును అందుబాటులోకి తెచ్చింది. ఉద్యోగుల పింఛను పథకం -1995 చట్టసవరణకు ముందుగా  (2014 సెప్టెంబరు 1కి ముందు) ఈపీఎఫ్‌ చందాదారుగా చేరి, ఆ తరువాత సర్వీసులో కొనసాగుతూ అధిక వేతనంపై ఈపీఎఫ్‌ చందాచెల్లిస్తూ ఈపీఎస్‌ చట్టంలోని పేరా నం.11(3) కింద ఉమ్మడి ఆప్షన్‌ ఇవ్వలేకపోయిన వారు అర్హులని పేర్కొంది. యజమానితో కలిసి ఉమ్మడి ఆప్షన్‌ ఇచ్చేందుకు గడువు మే 3గా పేర్కొంది. ఈ గడువులోగా అర్హులైన ఉద్యోగులు, కార్మికులు, వేతనజీవులు ఉమ్మడి ఆప్షన్‌ నమోదు చేయాలని స్పష్టం చేసింది.

ఆప్షన్‌ ఇలా: వేతనజీవులు, పింఛనుదారులు ఈపీఎఫ్‌ మెంబర్‌పోర్టల్‌ హోంపేజీలో ప్రత్యేక లింకును ఈపీఎఫ్‌వో ఆదివారం అర్ధరాత్రి ఏర్పాటు చేసింది. హోంపేజీలో అప్లికేషన్‌ ఫర్‌ జాయింట్‌ ఆప్షన్‌ లింకును క్లిక్‌ చేయాలి. ఆ తరువాత ఈపీఎస్‌ చట్టం 11(3) కింద ఆప్షన్‌కు దరఖాస్తును క్లిక్‌ చేయాలి. ఈ దరఖాస్తును భవిష్యనిధి యూనివర్సల్‌ అకౌంట్‌ నంబరు (యూఏఎన్‌) ఖాతాద్వారా పూర్తిచేయాలి. చందాదారు ఆధార్‌ నంబరు, పుట్టిన తేదీ వివరాలు ఈపీఎఫ్‌వో రికార్డుల ప్రకారం నమోదు చేయాలి. ఆధార్‌తో అనుసంధానమైన మొబైల్‌నంబరు ఉండాలి. 4దశల్లో వివరాలు పూర్తిచేశాక దరఖాస్తు నంబరు వస్తుంది.