మహిళల పెట్టుబడులూ స్థిరాస్తికే

బంగారంపై ఆసక్తి 8% మందికే
అనరాక్‌ సర్వే

దిల్లీ: మహిళల దగ్గర డబ్బులుంటే బంగారం కొనేందుకే మొగ్గుచూపుతారనే భావన ఉంది. అయితే 65 శాతం మంది మహిళలు స్థిరాస్తిలో పెట్టుబడులపైనే ఆసక్తి కనబరుస్తున్నారని తమ సర్వేలో తేలిందని స్థిరాస్తి కన్సల్టెంట్‌ అనరాక్‌ తెలిపింది. స్టాక్స్‌లో పెట్టుబడులు పెడతామని 20% మంది, బంగారం కొంటామని 8% మంది, కాలావధి డిపాజిట్‌ చేస్తామని 7% మంది వెల్లడించినట్లు పేర్కొంది. తాము మొత్తం 5500 మంది నుంచి అభిప్రాయాలు సమీకరించగా, అందులో సగం మంది మహిళలని వివరించింది. ఈ సంస్థ నివేదిక ప్రకారం..

* రూ.45 లక్షలకు మించిన నివాసాలు కొనుగోలు చేసేందుకు చూస్తున్నట్లు 83% మంది మహిళలు తెలిపారు. రూ.45-90 లక్షల శ్రేణి సౌకర్యవంతమని 36% మంది, రూ.90 లక్షలు-రూ.1.5 కోట్ల విలువైన ఆస్తులపై 27% మంది, రూ.కోటిన్నరకు మించిన సౌధాలు కొంటామని 20% మంది తెలిపారు.
* రూ.45 లక్షల కంటే తక్కువ విలువైన నివాసాల కొనుగోలుపై అతి తక్కువ మంది ఆసక్తి కనబరచారని అనరాక్‌ గ్రూప్‌ వైస్‌ ఛైర్మన్‌ సంతోష్‌ కుమార్‌ తెలిపారు. నివసించేందుకు-పెట్టుబడుల కోసం ఇళ్లు కొనుగోలు చేసే వారి నిష్పత్తి 82:18 నుంచి 77:23కి మారినట్లు తెలిపారు. మహిళలు తప్పనిసరిగా ఇంటికి సహ యజమానిగా ఉండేలా రూపొందించిన ప్రధాన్‌మంత్రి ఆవాస్‌ యోజన, వారి పేరిట ఇల్లు ఉంటే రుణ వడ్డీ - రిజిస్ట్రేషన్‌ సుంకంలో రాయితీల వంటివి మహిళల పేరిట ఇళ్ల నమోదుకు ఉపకరిస్తున్నాయని వెల్లడించారు.

రుణ చెల్లింపుల్లో అతివలే భేష్‌

వారికి ఇచ్చినవి రూ.16 లక్షల కోట్లు

ముంబయి: రుణాల తిరిగి చెల్లింపుల్లో పురుషులతో పోలిస్తే మహిళలే మేలని క్రెడిట్‌ ఇన్ఫర్మేషన్‌ కంపెనీ (సీఐసీ) ట్రాన్స్‌యూనియన్‌ సిబిల్‌ తెలిపింది. రుణ చెల్లింపు సామర్థ్యానికి దర్పణంగా నిలిచే క్రెడిట్‌ స్కోర్‌ పరంగా చూసినా, 57% మంది మహిళలు ‘ప్రైమ్‌’ విభాగంలోకి వస్తే, పురుషులు 51% మందే ఉన్నట్లు వివరించింది. వ్యక్తిగత రుణాలతో పాటు విలువైన సామగ్రి కొనుగోలుకు రుణాలు తీసుకోవడంలోనూ మహిళలు ఆసక్తి కనబరుస్తున్నారని తెలిపింది. వ్యాపార రుణాల్లోనూ 32% మంది మహిళలే ఉంటున్నారు.
* దేశంలో 45.40 కోట్ల మంది మహిళలుంటే, 2022 నాటికి 6.3 కోట్ల మంది రుణాలు తీసుకున్నారు. 2022లో ఎక్కువమంది వ్యవసాయ రుణాలు, విలువైన వస్తువుల కొనుగోలుకు రుణం తీసుకున్నారు.
* మహిళల పేరిట ఇచ్చిన రుణాల మొత్తం రూ.16 లక్షల కోట్లకు చేరిందని, మొత్తం రుణాల్లో ఇది 19 శాతానికి సమానమని పేర్కొంది.
* 91.7 లక్షల మంది మహిళలు రుణాలు తీసుకోవడం ద్వారా, ఈ విభాగంలో తమిళనాడు దేశంలోనే ముందు ఉందని తెలిపింది.

8.5% నుంచే గృహ రుణాలు: బీఓబీ

దిల్లీ:ఈ నెల 31 వరకు గృహ రుణాలపై వడ్డీ రేటును 0.4% తగ్గిస్తున్నట్లు బ్యాంక్‌ ఆఫ్‌ బరోడా (బీఓబీ) ప్రకటించింది. దీంతో బీఓబీ గృహ రుణాలు 8.5% నుంచి లభించనున్నాయి. ఎంఎస్‌ఎంఈ రుణాలపై ప్రారంభ వడ్డీ రేటును 8.40 శాతానికి తగ్గించారు. ప్రాసెసింగ్‌ ఛార్జీలను గృహరుణాలపై  100 శాతం, ఎంఎస్‌ఎంఈ రుణాలపై 50% తగ్గించామంది.