JIO: జియో చేతికి అమెరికా కంపెనీ!

5జీ సేవల బలోపేతానికి వినియోగం

దిల్లీ: రిలయన్స్‌ ఇండస్ట్రీస్‌కు చెందిన జియో ప్లాట్‌ఫామ్స్‌ అమెరికాకు చెందిన కమ్యూనికేషన్స్‌ సామగ్రి తయారీ సంస్థ మిమోసా నెట్‌వర్క్స్‌ను 60 మిలియన్‌ డాలర్ల (దాదాపు రూ.490 కోట్లు)తో కొనుగోలు చేయనుంది. 5జీ టెలికాం, బ్రాడ్‌బ్యాండ్‌ సేవలను మరింత బలోపేతం చేసేందుకు ఈ నిర్ణయం తీసుకుంది. మిమోసా నెట్‌వర్క్స్‌ను కొనుగోలు చేసేందుకు అమెరికాకు చెందిన ఎయిర్‌స్పాన్‌ నెట్‌వర్క్స్‌ హోల్డింగ్స్‌తో జియో ప్లాట్‌ఫామ్స్‌ అనుబంధ సంస్థ రాడిసిస్‌ కార్పొరేషన్‌ ఒప్పందం కుదుర్చుకున్నట్లు ఇరు కంపెనీలు పేర్కొన్నాయి. వైఫై-5తో పాటు సరికొత్త వైఫై 6ఈ సాంకేతికత ఆధారంగా పాయింట్‌-టు-మల్టీ పాయింట్‌ ఉత్పత్తులతో పాటు సంబంధిత విడిభాగాలనూ మిమోసా తయారు చేస్తోంది. ఇంత వరకు ఈ కంపెనీకి ప్రధాన వినియోగదారుగా ఉన్న జియో.. ఇపుడు యజమానిగా మారనుంది. చైనా సాంకేతికత నుంచి దూరం జరగాలని ప్రపంచ దేశాలు భావిస్తున్న ఈ తరుణంలో ఈ పరిణామం చేసుకోవడం విశేషం. 2018లో మిమోసాను ఎయిర్‌స్పాన్‌ కొనుగోలు చేసింది.

మరిన్ని నగరాలకు 5జీ సేవలు: ఇప్పటికే తెలంగాణాలో 10 నగరాల్లో 5జీ సేవలందిస్తున్న జియో, కొత్తగా సిద్ధిపేట, సంగారెడ్డి, జగిత్యాల, కొత్తగూడెం, కోదాడ, తాండూర్‌, జహీరాబాద్‌, నిర్మల్‌ ప్రాంతాలకూ విస్తరించినట్లు తెలిపింది.