Adani-LIC: అదానీ కంపెనీలకు ఎల్‌ఐసీ రుణాలు రూ.6,183 కోట్లు

దిల్లీ: అదానీ గ్రూప్‌ కంపెనీలకు లైఫ్‌ ఇన్సూరెన్స్‌ కార్పొరేషన్‌ ఆఫ్‌ ఇండియా (ఎల్‌ఐసీ) ఇచ్చిన రుణాలు మార్చి 5 నాటికి రూ.6,183 కోట్ల మేర ఉన్నట్లు ఆర్థిక మంత్రి నిర్మలా సీతారామన్‌ సోమవారం లోక్‌సభకు రాతపూర్వకంగా తెలిపారు. ఈ రుణాలు 2022 డిసెంబరు 31న రూ.6,347 కోట్లుగా ఉన్నాయని పేర్కొన్నారు. అదానీ గ్రూప్‌లో ఏఏ సంస్థ ఎల్‌ఐసీ నుంచి ఎంత మేర రుణాలు తీసుకుందంటే..

* అదానీ పోర్ట్స్‌ అండ్‌ ఎస్‌ఈజెడ్‌ - రూ.5,388.60 కోట్లు
* అదానీ పవర్‌ (ముంద్రా) - రూ.266.00 కోట్లు
* అదానీ పవర్‌ (మహారాష్ట్ర-ఫేజ్‌1)- రూ.81.60 కోట్లు
* అదానీ పవర్‌ (మహారాష్ట్ర-ఫేజ్‌3)- రూ.254.87 కోట్లు
* రాయ్‌గఢ్‌ ఎనర్జీ జనరేషన్‌ - రూ.45.00 కోట్లు
* రాయ్‌పుర్‌ ఎనర్జెన్‌ - రూ.145.67 కోట్లు

* ప్రభుత్వ రంగంలోని మిగతా 5 సాధారణ బీమా కంపెనీలు అదానీ గ్రూప్‌ కంపెనీలకు ఎలాంటి రుణాలు అందించలేదని తెలిపాయని ఆర్థిక మంత్రి వెల్లడించారు.

ప్రభుత్వం కమిటీని నియమించలేదు.. సెబీ విచారిస్తోంది!

అదానీ గ్రూప్‌లో ఆర్థిక అవకతవకలు జరిగాయని, అకౌంటింగ్‌ మోసాలకు ఆ సంస్థ పాల్పడినట్లు యూఎస్‌ షార్ట్‌ సెల్లర్‌ హిండెన్‌బర్గ్‌ చేసిన ఆరోపణలపై విచారణ జరిపేందుకు ప్రభుత్వం ఏ కమిటీని నియమించలేదని ఆర్థిక సహాయ మంత్రి పంకజ్‌ చౌధరి లోక్‌సభకు వెల్లడించారు. అదానీ గ్రూప్‌నకు చెందిన 9 నమోదిత కంపెనీలు (ఎన్‌డీటీవీ మినహా) జనవరి 24 నుంచి మార్చి 1 మధ్య సుమారు 60 శాతం మేర మార్కెట్‌ విలువ కోల్పోయాయని, ఈ నేపథ్యంలో మార్కెట్ల నియంత్రణ సంస్థ సెబీ విచారణ జరుపుతోందని మంత్రి వివరించారు. ఈ కంపెనీల షేర్ల ధరల్లో ఒడుదొడుకులు నిఫ్టీ 50పై పెద్దగా ప్రభావం చూపలేదని, నిఫ్టీ ఈ సమయంలో 4.5 శాతమే కోల్పోయిందని ఆయన పేర్కొన్నారు.

* అదానీ కంపెనీ దిగుమతి చేసుకుంటున్న విద్యుదుత్పత్తి, సరఫరా పరికరాల వ్యవహారంపై డీఆర్‌ఐ జరిపిన విచారణ ముగిసిందని మంత్రి తెలిపారు. నివేదికను సంబంధిత న్యాయ అధికారులకు సమర్పించినట్లు వెల్లడించారు.