ఐటీ షేర్లలో స్థిరీకరణకు అవకాశం

16,800 దిగువకొస్తే నిఫ్టీలో దిద్దుబాటే
17,300 స్థాయి ఎగువన లాభాలు
లోహ, బ్యాంకు షేర్లలో సానుకూలతలు
విశ్లేషకుల అంచనాలు
స్టాక్‌ మార్కెట్‌ ఈ వారం

దేశీయ స్టాక్‌ మార్కెట్లు సోమవారం ఒక శ్రేణికి లోబడి చలిస్తాయని కొంత మంది.. ఇప్పటికే స్థిరీకరణ కనిపించినందున లాభాలతో మొదలవుతాయని మరికొంత మంది విశ్లేషకులు అంటున్నారు. నిఫ్టీ-50కి 16,800 పాయింట్ల వద్ద మద్దతు లభించొచ్చని, 17,200 వద్ద నిరోధం ఎదురుకావొచ్చని చెబుతున్నారు. నిఫ్టీ 50 ఒక వేళ 16,800 వద్ద మద్దతును దొరకబుచ్చుకోలేకపోతే 16,450-16,400 వరకు దిగజారొచ్చని సాంకేతిక నిపుణులు చెబుతున్నారు. 17,300-17,350 స్థాయిని అధిగమిస్తేనే 17,500 లేదా అంతకంటే ఎగువకు వెళ్లగలదని అంటున్నారు. ఐటీ షేర్లలో కొంత స్థిరీకరణ కనిపించొచ్చనీ అంచనా వేస్తున్నారు.  ఈ వారం వెలువడే అమెరికా ఫెడరల్‌ రిజర్వ్‌ విధాన నిర్ణయంపై మదుపర్లు దృష్టి సారించాలి. వివిధ రంగాలపై విశ్లేషకులు ఏమంటున్నారంటే..

* మార్కెట్‌పై సానుకూలతలున్నందున ఎఫ్‌ఎమ్‌సీజీ వంటి రక్షణాత్మక రంగాలకు మదుపర్లు దూరం జరగొచ్చు. అయితే వేసవి ఎండలు ముదురుతున్నందున, వరుణ్‌ బేవరేజెస్‌, రాడియో ఖైతాన్‌, గోద్రేజ్‌ కన్జూమర్‌ షేర్లు రాణించే అవకాశం ఉంది.

* కొంత లాభాల అనంతరం ఔషధ కంపెనీల షేర్లు ప్రతికూల ధోరణిలో స్థిరీకరణకు గురి కావొచ్చు. నిఫ్టీ ఫార్మా సూచీ 11,800-11,900 స్థాయికి చేరేవరకు ఒత్తిడిలోనే కొనసాగొచ్చు. దివీస్‌ లేబొరేటరీస్‌, ఇప్కా లేబొరేటరీస్‌, ఫైజర్‌ షేర్లలో బలహీనతలు ఉండొచ్చు.

* లోహ కంపెనీల షేర్లు సానుకూల ధోరణిలో చలించొచ్చు. చైనాలో గిరాకీ పుంజుకుంటుండడం ఇందుకు దోహదం చేయొచ్చు. టాటా స్టీల్‌, జిందాల్‌ స్టీల్‌ అండ్‌ పవర్‌, సెయిల్‌లలో ‘బులిష్‌’ ధోరణి కనిపించొచ్చు.

* యంత్ర పరికరాల షేర్లు స్వల్పకాలం నుంచి మధ్యకాలానికి సానుకూలంగా ఉండొచ్చు. ఎల్‌ అండ్‌ టీ, సీమెన్స్‌ తమ 50 రోజుల చలన సగటు కంటే పైనే కదలాడుతున్నాయి.  

* సిమెంటు కంపెనీల షేర్లు ఊగిసలాటలను ఎదుర్కోవచ్చు. గృహ విభాగం నుంచి గిరాకీ పెరుగుతున్నా.. ధరల పెంపును నిలబెట్టుకోవడానికి కంపెనీలు ఇబ్బందులు పడుతుండడం ఇందుకు నేపథ్యం. ఈ నేపథ్యంలో దీర్ఘకాల పెట్టుబడులపై జాగ్రత్త పడాలి.

* ఎస్‌వీబీ దివాలా నేపథ్యంలో, గురువారం సమీక్షలో అమెరికా ఫెడరల్‌ రిజర్వ్‌, వడ్డీరేట్లను 0.25% పెంచొచ్చు.. లేదా పెంచకపోవచ్చు. ఈ పరిమాణాన్ని బట్టి ఐటీ షేర్ల దిశ ఆధారపడి ఉంటుంది. టీసీఎస్‌ సీఈఓ హఠాత్‌ రాజీనామా నేపథ్యంలో ఆ కంపెనీ షేర్లను గమనించొచ్చు.

* టెలికాం షేర్లు ఒక శ్రేణికి లోబడి చలించొచ్చు. జియో మాతృ సంస్థ రిలయన్స్‌ ఇండస్ట్రీస్‌ షేర్లకు రూ.2,200 వద్ద బలమైన మద్దతు కనిపిస్తోంది.  

* ఐఓసీ, బీపీసీఎల్‌, హెచ్‌పీసీఎల్‌ వంటి చమురు రిఫైనింగ్‌ కంపెనీల షేర్లు రాణించొచ్చు. చమురు ధరలు తగ్గుతుండడంతో పాటు అమెరికా ఫెడరల్‌ రిజర్వ్‌ రేట్ల పెంపులో దూకుడుగా వెళ్లే అవకాశం లేకపోవడం ఇందుకు దోహదం చేయొచ్చు.  

* బ్యాంకు షేర్లు రాణించొచ్చు. నిఫ్టీ బ్యాంక్‌ సూచీ 38,600 స్థాయి నుంచి రికవరీ చెందడం సానుకూలాంశం. ఈ వారం 39,000-40,500 శ్రేణిలో చలించొచ్చు. హెచ్‌డీఎఫ్‌సీ బ్యాంక్‌, కోటక్‌ మహీంద్రా బ్యాంక్‌, ఎస్‌బీఐ షేర్లపై దృష్టి సారించొచ్చు.

* వాహన కంపెనీల షేర్లలో స్థిరీకరణ ఏర్పడొచ్చు. చమురు ధరలు మరింత పడ్డా; రేట్ల పెంపుపై ఫెడ్‌ సానుకూలంగా స్పందించినా.. నిఫ్టీ వాహన సూచీకి సానుకూలతలు తీసుకురావొచ్చు.