హ్యుందాయ్‌ వెర్నా కొత్త వెర్షన్‌

ప్రారంభ ధర రూ.10.89 లక్షలు

దిల్లీ: హ్యుందాయ్‌ మోటార్‌ ఇండియా తమ మధ్య స్థాయి సెడాన్‌ వెర్నాలో కొత్త వెర్షన్‌ను మంగళవారం దేశీయంగా పరిచయం చేసింది. వీటి ధరల శ్రేణి రూ.10.89-17.37 లక్షలు (ఎక్స్‌-షోరూమ్‌)గా నిర్ణయించింది. 1.5 లీటర్‌ ఇంజిన్‌ కలిగిన 6వ తరం వెర్నా ధరలు రూ.10.89-16.19 లక్షలు కాగా, 1.5 లీటర్‌ టర్బో పెట్రోల్‌ వేరియంట్ల ధరలు రూ.14.83-17.37 లక్షల (అన్ని ధరలు ఎక్స్‌-షోరూమ్‌) మధ్య ఉన్నాయి. ఈ కార్లు ఇంజిన్‌ ఆధారంగా, లీటరుకు 18.6-20.6 కిలోమీటర్ల మైలేజీ అందిస్తాయని కంపెనీ తెలిపింది. 2006లో వెర్నా బ్రాండ్‌ను మన దేశంలో హ్యుందాయ్‌ ప్రవేశపెట్టింది. ఇప్పటి వరకు ఈ మోడల్‌ కార్లు 4.65 లక్షలు దేశీయంగా విక్రయించగా, 4.5 లక్షలు ఎగుమతి చేసినట్లు కంపెనీ ఎండీ, సీఈఓ ఉన్సూ కిమ్‌ వెల్లడించారు. కొత్త వెర్షన్‌ వెర్నాలను కూడా ఎగుమతి చేస్తామని తెలిపారు. హోండా సిటీ, స్కోడా స్లేవియా, ఫోక్స్‌వ్యాగన్‌ వర్టుస్‌, మారుతీ సుజుకీ సియాజ్‌ కార్లతో దేశీయ విపణిలో కొత్త వెర్షన్‌ వెర్నా పోటీ పడబోతోందని చెబుతున్నారు.