Allu Arjun: అల్లు అర్జున్‌ బ్రాండ్‌ విలువ ఎంతో తెలుసా?

క్రోల్‌ జాబితా అగ్రశ్రేణి 25లో చోటు

ఈనాడు, హైదరాబాద్‌: దేశంలో అత్యంత బ్రాండు విలువ కలిగిన అగ్రశ్రేణి 25 మంది జాబితాలో ప్రముఖ సినీ నటుడు అల్లు అర్జున్‌ తొలిసారి చోటు సంపాదించుకున్నారు. 2022 ఏడాదికి ‘సెలబ్రిటీ బ్రాండ్‌ వాల్యుయేషన్‌ స్టడీ’ నివేదికను ఆర్థిక సలహాల సంస్థ క్రోల్‌ విడుదల చేసింది. ఇందులో అగ్రశ్రేణి 25 మంది ప్రముఖుల బ్రాండు విలువ 160 కోట్ల డాలర్ల మేరకు ఉంది. 2021తో పోలిస్తే ఇది 29.1% పెరిగింది. ఈ జాబితాలో బాలీవుడ్‌ నటుడు రణ్‌వీర్‌ సింగ్‌ రూ.1500 కోట్ల (18.17 కోట్ల డాలర్ల)తో తొలి స్థానంలో నిలిచారు. తర్వాత విరాట్‌ కోహ్లి రూ.1450 కోట్లు (17.69 కోట్ల డాలర్లు), అక్షయ్‌ కుమార్‌ రూ. 1260 కోట్లు (15.36 కోట్ల డాలర్లు), ఆలియా భట్‌  రూ. 850 కోట్లు(10.29 కోట్ల డాలర్లు), దీపికా పదుకోన్‌ రూ. 680 కోట్లు (8.29 కోట్ల డాలర్లు) ఉన్నారు. అల్లు అర్జున్‌ రూ.260 కోట్ల (3.14 కోట్ల డాలర్లు) బ్రాండు విలువతో 20వ స్థానంలో ఉన్నారు. బ్యాడ్మింటన్‌ క్రీడాకారిణి పీవీ సింధు రూ.219 కోట్లతో(26.5 కోట్ల డాలర్లు) 23వ స్థానంలో, సినీ నటి రష్మిక మందన్న రూ.209 కోట్ల (25.3 కోట్ల డాలర్లు) బ్రాండు విలువతో 25వ స్థానంలో నిలిచారు. హార్ధిక్‌ పాండ్యా, ఒలింపిక్స్‌ బంగారు పతక విజేత నీరజ్‌ చోప్రా తొలిసారి ఈ జాబితాలో చోటు సాధించారు.