మళ్లీ అదనపు నిఘా కిందకు అదానీ పవర్‌ షేర్లు

దిల్లీ: అదానీ పవర్‌ షేర్లను మళ్లీ స్వల్పకాలం పాటు అదనపు నిఘా వ్యవస్థ (ఏఎస్‌ఎం) కిందకు ఎన్‌ఎస్‌ఈ, బీఎస్‌ఈ తీసుకొచ్చాయి. ‘మార్చి 23 నుంచి ఏఎస్‌ఎం స్టేజ్‌ 1 పరిధిలోకి అదానీ పవర్‌ను తీసుకొస్తున్నట్లు’ ఎక్స్ఛేంజీలు తెలిపాయి. అదానీ గ్రూపునకు చెందిన మరో రెండు కంపెనీలు- అదానీ గ్రీన్‌ ఎనర్జీ, ఎన్‌డీటీవీ షేర్లను సోమవారమే దీర్ఘకాలిక ఏఎస్‌ఎం రెండో దశ నుంచి మొదటి దశకు ఎక్స్ఛేంజీలు మార్చాయి. 3 రోజుల వ్యవధిలోనే అదానీ పవర్‌ను కూడా ఏఎస్‌ఎం కిందకు ఎక్స్ఛేంజీలు తీసుకొచ్చాయి.
నీ షేర్ల ధరల్లో అధిక ఒడుదొడుకుల నేపథ్యంలో, అదానీ ఎంటర్‌ప్రైజెస్‌, అదానీ విల్మర్‌తో పాటు అదానీ పవర్‌ షేర్లను మార్చి 8న స్వల్పకాలిక ఏఎస్‌ఎం కిందకు స్టాక్‌ ఎక్స్ఛేంజీలు తీసుకొచ్చాయి. మార్చి 17న మళ్లీ ఆంక్షలు తొలగించాయి.

* ఏఎస్‌ఎం పరిధిలోకి తీసుకు రావాలంటే.. గరిష్ఠ- కనిష్ఠాల వ్యత్యాసం, క్లయింట్ల ఆసక్తి, ప్రైస్‌ బ్యాండ్‌ హిట్స్‌ సంఖ్య, ముగింపు- ముగింపు ధరల వ్యత్యాసం, ప్రైస్‌- ఎర్నింగ్‌ రేషియో లాంటి వాటిని ప్రామాణికంగా తీసుకుంటారు. వీటి ఆధారంగానే మళ్లీ అదానీ పవర్‌ను స్వల్పకాలిక ఏఎస్‌ఎం పరిధిలోకి తీసుకొచ్చినట్లు ఎక్స్ఛేంజీలు పేర్కొన్నాయి. ఏఎస్‌ఎం పరిధిలో ఉండే కంపెనీ షేర్లకు, ఇంట్రాడే ట్రేడింగ్‌లో ముందస్తుగా 100 శాతం మార్జిన్‌  చెల్లించాల్సి ఉంటుంది.