ప్రైవేట్‌ ఆసుపత్రుల ఆదాయాల్లో 10-11% వృద్ధి

క్రిసిల్‌ రేటింగ్స్‌ నివేదిక

ముంబయి: 2022-23, 2023-24 ఆర్థిక సంవత్సరాల్లో ప్రైవేట్‌ ఆసుపత్రుల ఆదాయం 10-11 శాతం వృద్ధి చెందొచ్చని క్రిసిల్‌ రేటింగ్స్‌ నివేదికలో అంచనా వేసింది. దేశీయ గిరాకీ, ఔషధ పర్యాటకం పుంజుకోవడం ఇందుకు కారణాలుగా పేర్కొంది. పడకల భర్తీ, భర్తీ అయిన పడకలపై సగటు ఆదాయం స్థిరంగా ఉండటం కూడా ప్రైవేట్‌ ఆసుపత్రులకు కలిసొస్తున్నట్లు వెల్లడించింది. 2021-22లో కొవిడ్‌-19 రెండో దశ విజృంభణ కారణంగా ప్రైవేట్‌ ఆసుపత్రులు రికార్డు స్థాయిలో అధిక నిర్వహణ లాభాన్ని నమోదుచేశాయి. ఆ సమయంలో ఆక్యుపెన్సీ కూడా గరిష్ఠ స్థాయిలకు చేరింది. అనంతరం ఆరోగ్య అవగాహన పెరగడం, ఇతర కారణాలతో పడకల భర్తీ స్థిరంగా 60 శాతం వద్దే కొనసాగుతున్నట్లు క్రిసిల్‌ రేటింగ్స్‌ సీనియర్‌ డైరెక్టర్‌ అనూజ్‌ సేథీ తెలిపారు. మొదటి దశలో లాక్‌డౌన్‌ కారణంగా మాత్రమే ఆక్యుపెన్సీ 53 శాతానికి తగ్గినట్లు గుర్తుచేశారు.