రూ.1,337.76 కోట్ల జరిమానాను గూగుల్‌ కట్టాల్సిందే

సీసీఐ ఆదేశాలను సమర్థించిన ఎన్‌సీఎల్‌ఏటీ

దిల్లీ: కాంపిటీషన్‌ కమిషన్‌ ఆఫ్‌ ఇండియా(సీసీఐ) విధించిన రూ.1,337.76 కోట్ల జరిమానాను గూగుల్‌ చెల్లించాల్సిందేనని నేషనల్‌ కంపెనీ లా అప్పిలేట్‌ ట్రైబ్యునల్‌(ఎన్‌సీఎల్‌ఏటీ) ఆదేశించింది. ఆండ్రాయిడ్‌ మొబైళ్ల విషయంలో అనైతిక పోటీ విధానాలను అనుసరిస్తోందంటూ గూగుల్‌కు గతేడాది అక్టోబరు 20న సీసీఐ ఈ జరిమానాను విధించింది. ఈ ఆదేశాలను సవాలు చేస్తూ ఎన్‌సీఎల్‌ఏటీని గూగుల్‌ ఆశ్రయించింది. అయితే సీసీఐ ఆదేశాలను ఎన్‌సీఎల్‌ఏటీ ద్విసభ్య ధర్మాసనం కూడా సమర్థిస్తూ నిర్ణయం తీసుకుంది. సీసీఐ విధించిన జరిమానా చెల్లించేందుకు 30 రోజుల సమయాన్ని గూగుల్‌కు ఇచ్చింది. అలాగే మిగిలిన ఆదేశాలను కూడా 30 రోజుల్లోగా పాటించాలని తెలిపింది. ‘సీసీఐ జరిమానా తీర్పును సమర్థిస్తున్నాం. గతంలో జనవరి 4న ఇచ్చిన ఆదేశాల ప్రకారం ఇప్పటికే గూగుల్‌ చెల్లించిన 10 శాతాన్ని మినహాయించి.. మిగిలిన జరిమానాను 30 రోజుల్లోగా డిపాజిట్‌ చేయాల’ని ఎన్‌సీఎల్‌ఏటీ తన ఆదేశాల్లో పేర్కొంది. అలాగే 2022, అక్టోబరు 20న సీసీఐ జారీ చేసిన ఆదేశాల్లో కొన్ని మార్పులను కూడా చేసింది.