యూపీఐ లావాదేవీలపై ఛార్జీల్లేవు: ఎన్‌పీసీఐ

దిల్లీ: బ్యాంక్‌ ఖాతా నుంచి బ్యాంక్‌ ఖాతాకు చేసే యూపీఐ చెల్లింపులు లేదా సాధారణ యూపీఐ చెల్లింపులపై ఎటువంటి ఛార్జీలు విధించలేదని నేషనల్‌ పేమెంట్స్‌ కార్పొరేషన్‌ ఆఫ్‌ ఇండియా (ఎన్‌పీసీఐ) స్పష్టం చేసింది. ప్రీపెయిడ్‌ పేమెంట్‌ ఇన్‌స్ట్రుమెంట్స్‌ (పీపీఐ) మర్చంట్‌ లావాదేవీలపైన మాత్రమే ఇంటర్‌ఛేంజ్‌ ఛార్జీలు ఉంటాయని, వినియోగదారులపై ఎటువంటి ఛార్జీలు ఉండవని వెల్లడించింది. గూగుల్‌ పే, పేటీఎం వంటి యూపీఐ యాప్‌ లావాదేవీలపై సర్‌ఛార్జ్‌ చెల్లించాలన్న వార్తల నేపథ్యంలో ఎన్‌పీసీఐ వివరణ ఇచ్చింది. పీపీఐ వినియోగించి రూ.2000 పైబడిన యూపీఐ లావాదేవీ విలువలో 1.1 శాతం ఇంటర్‌ఛేంజ్‌ ఛార్జీని వసూలు చేసుకునేందుకు ఎన్‌పీసీఐ అనుమతి ఇచ్చిన విషయం తెలిసిందే. సెప్టెంబర్‌ 30న లేదా అంతకంటే ముందు ఈ ఛార్జీపై సమీక్షిస్తామని పేర్కొంది. ఏదైనా బ్యాంక్‌ ఖాతా, రూపే క్రెడిట్‌ కార్డు, యూపీఐ కలిగిన యాప్‌లపై ప్రీపెయిడ్‌ వాలెట్లను ఎంచుకునే సౌలభ్యం వినియోగదారులకు ఉన్నట్లు ఎన్‌పీసీఐ తెలిపింది. నీ పేటీఎం కూడా ఇదే తరహా ప్రకటన చేసింది. బ్యాంకు ఖాతా ద్వారా లేదా పేటీఎం వాలెట్‌ ద్వారా డబ్బు పంపినా.. ఎలాంటి ఛార్జీ ఉండదని తేల్చిచెప్పింది.