అరుదైన వ్యాధుల ఔషధాలకు దిగుమతి సుంకం మినహాయింపు

దిల్లీ: అరుదైన వ్యాధుల చికిత్స నిమిత్తం వ్యక్తిగత అవసరాల కోసం ప్రత్యేకంగా దిగుమతి చేసుకునే అన్ని ఔషధాలు, ఆహారంపై బేసిక్‌ కస్టమ్స్‌ సుంకాన్ని ప్రభుత్వం మినహాయించింది. ఈ దిగుమతి సుంకం రద్దు ఏప్రిల్‌ 1 నుంచి అమల్లోకి రానుంది. పలు రకాల కేన్సర్‌ల చికిత్సలో వాడే పెంబ్రోలిజుమాబ్‌(కీట్రూడా)పై కూడా బేసిక్‌ కస్టమ్స్‌ సుంకాన్ని తొలగించింది. సాధారణంగా ఔషధాలపై 10 శాతం బేసిక్‌ కస్టమ్స్‌ సుంకం విధిస్తున్నారు. కొన్ని ప్రాణాధార ఔషధాలు/వ్యాక్సిన్‌లపై 5 శాతం లేదా సున్నా పన్ను ఉంది. 2021లో తీసుకొచ్చిన జాతీయ విధానంలో గుర్తించిన అరుదైన వ్యాధులకు ఈ మినహాయింపు వర్తిస్తుంది. రోగి వ్యాధి బట్టి ప్రత్యేక పోషకాలు లభించేందుకు రూపొందించే ఆహారాన్ని ప్రత్యేక అవసరాల విభాగంలో విభజించారు. పన్ను మినహాయింపు పొందాలంటే రాష్ట్ర, కేంద్ర ఆర్యోగ సేవలు, జిల్లా ఔషధ అధికారి, సివిల్‌ సర్జన్‌ నుంచి వ్యక్తిగత దిగుమతిదారు పొందిన ధ్రువీకరణపత్రాన్ని(సర్టిఫికెట్‌)ను సమర్పించాల్సి ఉంటుంది.