తగ్గిన కరెంటు ఖాతా లోటు

అక్టోబరు- డిసెంబరులో జీడీపీలో 2.2 శాతానికి: ఆర్‌బీఐ

దిల్లీ: గత ఆర్థిక సంవత్సరం (2022-23) అక్టోబరు- డిసెంబరులో దేశ కరెంటు ఖాతా లోటు 18.2 బిలియన్‌ డాలర్లు లేదా జీడీపీలో 2.2 శాతానికి తగ్గిందని ఆర్‌బీఐ తెలిపింది. 2022-23 రెండో త్రైమాసికంలో కరెంటు ఖాతా లోటు 30.9 బి.డాలర్లు లేదా జీడీపీలో 3.7 శాతంగా ఉంది. 2021-22 అక్టోబరు- డిసెంబరులో కరెంటు ఖాతా లోటు 22.2 బి.డాలర్లు లేదా జీడీపీలో 2.7 శాతంగా నమోదైంది. 2022-23 రెండో త్రైమాసికంలో 78.3 బి.డాలర్లుగా ఉన్న వాణిజ్య లోటు, మూడో త్రైమాసికంలో 72.7 బి.డాలర్లకు తగ్గడం వల్లే కరెంటు ఖాతా లోటు దిగివచ్చిందని ఆర్‌బీఐ తెలిపింది. సేవల ఎగుమతుల్లో 24.5 శాతం వృద్ధి ఉండటమూ ఇందుకు దోహదం చేసిందని పేర్కొంది.