ప్రభుత్వ అప్పులు రూ.150.95 లక్షల కోట్లు

2022-23 డిసెంబరు త్రైమాసికానికి

దిల్లీ: ప్రభుత్వ మొత్తం అప్పులు 2022-23 ఆర్థిక సంవత్సరం డిసెంబరు త్రైమాసికం ముగిసేసరికి రూ.150.95 లక్షల కోట్లకు చేరాయి. 2022 సెప్టెంబరు త్రైమాసికం ఆఖరుకున్న   రూ.147.19 లక్షల కోట్ల అప్పులతో పోలిస్తే    2.6% పెరిగాయి. ఈ నివేదికను శనివారం ఆర్థిక శాఖ విడుదల చేసింది. సుమారు 28.29 శాతం అప్పులకు 5 ఏళ్లలోపు గడువు తీరనుంది. 2022-23 మూడో త్రైమాసికంలో కేంద్రం సెక్యూరిటీల ద్వారా రూ.3,51,000 కోట్లను సమీకరించింది. ఇదే త్రైమాసికంలో గడువు తీరిన రూ.85,377.90 కోట్లను చెల్లించింది. ఈ త్రైమాసికంలో ప్రభుత్వం నగదు నిర్వహణ బిల్లుల ద్వారా ఎలాంటి మొత్తాన్ని సేకరించలేదు. రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) ప్రభుత్వ సెక్యూరిటీలకు ఓపెన్‌ మార్కెట్‌ లావాదేవీలను కూడా నిర్వహించలేదు.