39 లక్షల వాహన విక్రయాలు

2021-22 కంటే 27% అధికం
2023-24లో 40.5-41 లక్షలకు  చేరొచ్చని అంచనా

దిల్లీ: 2022-23 ఆర్థిక సంవత్సరం వాహన పరిశ్రమకు అత్యుత్తమంగా నిలిచింది. మొత్తం అన్ని కంపెనీలు  కలిసి 38.89 లక్షల ప్రయాణికుల వాహనాలను (కార్లు, స్పోర్ట్స్‌ వినియోగ వాహనాలు, వ్యాన్లు) టోకుగా డీలర్లకు విక్రయించాయి. 2021-22లో విక్రయించిన 30.68 లక్షలతో పోలిస్తే ఈ సంఖ్య 27% అధికమని మారుతీ సుజుకీ  ఇండియా సీనియర్‌ ఎగ్జిక్యూటివ్‌ అధికారి (మార్కెటింగ్‌, విక్రయాలు) శశాంక్‌ శ్రీవాస్తవ వెల్లడించారు. ప్రస్తుత ఆర్థిక సంవత్సరం (2023-24)లో విక్రయాలు 40.5-41 లక్షలకు చేరొచ్చని అంచనా వేశారు. ఉత్పత్తి కార్యకలాపాలపై చిప్‌ల కొరత ప్రభావం ఉన్నా గత ఆర్థిక సంవత్సరంలో అత్యధిక విక్రయాలు నమోదయ్యాయని వివరించారు. నూతన ఆర్థిక సంవత్సరంలో పరిశ్రమ 5-7 శాతం వృద్ధి నమోదు చేయొచ్చని.. ఎంఎస్‌ఐ అంతకు మించి రాణిస్తుందని శ్రీవాస్తవ అంచనా వేశారు.

దిగ్గజాలు రాణించాయ్‌

మారుతీ సుజుకీ, హ్యుందాయ్‌, టాటా మోటార్స్‌ సంస్థలు డీలర్లకు అత్యధిక సంఖ్యలో వాహనాలను సరఫరా చేశాయి. మారుతీ సుజుకీ ఇండియా 2021-22లో మొత్తం 16,52,653 వాహనాలను టోకుగా విక్రయించగా, 2022-23లో ఈ సంఖ్య 19 శాతం మేర పెరిగి 19,66,164 కి చేరింది. ఇందులో దేశీయ సరఫరాలే 14,14,277 నుంచి 17,06,831 వాహనాలకు చేరాయి.

* భారత్‌లో కార్యకలాపాలు ప్రారంభించినప్పటి నుంచి అత్యధికంగా గత ఆర్థిక సంవత్సరంలోనే టోకు విక్రయాలు నమోదు చేసినట్లు హ్యుందాయ్‌ మోటార్‌ ఇండియా తెలిపింది. ఈ సంస్థ గత ఆర్థిక సంవత్సరంలో 7,20,565 వాహనాలను టోకుగా విక్రయించింది. 2021-22లో సరఫరా చేసిన 6,10,760 వాహనాలతో పోలిస్తే ఇవి 18 శాతం ఎక్కువ. దేశీయ సరఫరా 4,81,500 వాహనాల నుంచి 18 శాతం పెరిగి 5,67,546కు చేరింది.

* టాటా మోటార్స్‌ కూడా ఉత్తమ పని తీరు కనబరిచింది. దేశీయ విపణిలో ప్రయాణికుల వాహనాల సరఫరా 3,70,372 నుంచి 45 శాతం పెరిగి 5,38,640కు చేరింది.

* కియా ఇండియా విక్రయాలు 1,86,787 నుంచి 44 శాతం పెరిగి 2,69,229కు చేరాయి. మార్చి త్రైమాసికంలో అత్యధిక స్థాయిలో 7.4 శాతం మార్కెట్‌ వాటా సాధించింది.

* టయోటా కిర్లోస్కర్‌ మోటార్‌ (టీకేఎం) టోకు విక్రయాలు 1,23,770 నుంచి 41 శాతం పెరిగి 1,74,015కు చేరాయి.