TCS: పనిచేయడానికి అత్యుత్తమం టీసీఎస్‌

రెండో స్థానంలో అమెజాన్‌
దేశీయ సంస్థలతో లింక్డ్‌ఇన్‌ 2023 జాబితా

దిల్లీ: ‘మన దేశంలో పనిచేయడానికి ఉత్తమమైనవిగా’ ఉద్యోగులు భావిస్తున్న కంపెనీల జాబితాలో  అగ్రస్థానాన్ని ఐటీ దిగ్గజం టాటా కన్సల్టెన్సీ సర్వీసెస్‌ (టీసీఎస్‌) పొందింది. సామాజిక మాధ్యమ సంస్థ లింక్డ్‌ఇన్‌ భారత్‌లో అత్యుత్తమ 25 కంపెనీలతో జాబితాను వెలువరించింది. ఇ కామర్స్‌ దిగ్గజ సంస్థ అమెజాన్‌, ఇన్వెస్ట్‌మెంట్‌ బ్యాంక్‌-ఆర్థిక సేవల సంస్థ మోర్గాన్‌ స్టాన్లీ రెండు, మూడు స్థానాలు దక్కించుకున్నాయి. గతేడాది జాబితాలో టెక్‌ కంపెనీలు ఆధిపత్యం ప్రదర్శించగా.. ఈసారి ఆర్థిక సేవలు, చమురు-గ్యాస్‌, నిపుణుల సేవలు, తయారీ, గేమింగ్‌ కంపెనీలు జాబితాలో ఎక్కువగా చోటు సాధించాయి. జాబితాలోని పలు అంశాలు ఇలా..

* అగ్రగామి 25 కంపెనీల్లో 10 కంపెనీలు ఆర్థిక సేవలు/ బ్యాంకింగ్‌/ ఫిన్‌టెక్‌ రంగాలకు చెందినవే ఉన్నాయి. మెక్వారీ గ్రూప్‌ (5వ స్థానం), హెచ్‌డీఎఫ్‌సీ బ్యాంక్‌ (11), మాస్టర్‌కార్డ్‌ (12), యుబీ (14) స్థానాల్లో ఉన్నాయి.
* ఇ-స్పోర్ట్స్‌, గేమింగ్‌ రంగాల  కంపెనీలు తొలిసారిగా ఈ జాబితాలో చోటు పొందాయి. డ్రీమ్‌11 సంస్థ 20వ స్థానంలో, గేమ్స్‌ 24+7  సంస్థ 24వ స్థానంలో నిలిచింది.
* జాబితాలోని 25 కంపెనీల్లో 17 తొలిసారి చోటు దక్కించుకున్నవే కావడం గమనార్హం. భారత వ్యాపార వ్యవస్థ జోరు కొనసాగించడాన్ని ఇది సూచిస్తోంది. గతేడాది లింక్డ్‌ఇన్‌ అగ్రగామి అంకుర సంస్థల జాబితాలో ఉన్న జెప్టో.. తాజా జాబితాలో 16వ స్థానం పొందింది.

ఈ అంశాల ఆధారంగా: రాణించే సామర్థ్యం, నైపుణ్యాల వృద్ధి, కంపెనీ స్థిరత్వం, విదేశీ అవకాశాలు, కంపెనీ అనుబంధం, లింగ వైవిధ్యం, విద్యా నేపథ్యం, ఉద్యోగుల ఉనికి వంటి అంశాల ఆధారంగా, కంపెనీలకు ఈ జాబితాలో లింక్డ్‌ఇన్‌ చోటు కల్పించింది.

ఈ నైపుణ్యాలపై కంపెనీల ఆసక్తి: కృత్రిమ మేధ, రోబోటిక్స్‌, ఎలక్ట్రానిక్స్‌, సాఫ్ట్‌వేర్‌ టెస్టింగ్‌ కంప్యూటర్‌ సెక్యూరిటీ వంటి నైపుణ్యాలు కలిగిన వారిని చేర్చుకునేందుకు కంపెనీలు మొగ్గుచూపుతున్నాయి.

* ‘ప్రస్తుత అనిశ్చితి పరిస్థితుల్లో భవిష్యత్‌ వృద్ధి, దీర్ఘకాల విజయాలు ఇచ్చే కంపెనీల కోసం నిపుణులు చూస్తున్నారు. ఉద్యోగావకాశాలకు వెతుక్కునేందుకు వీలుగా ఈ జాబితా వెలువరించామ’ని లింక్డ్‌ఇన్‌ ఇండియా మేనేజింగ్‌ ఎడిటర్‌ నిరాజిత బెనర్జీ తెలిపారు. 

బెంగళూరుకు అగ్రస్థానం: ఈ జాబితాలోని కంపెనీల్లో అత్యధికం బెంగళూరు కేంద్రంగా పనిచేస్తున్నాయి. ముంబయి, హైదరాబాద్‌, దిల్లీ, పుణె తర్వాతి స్థానాల్లో ఉన్నాయి. నియామకాలు కూడా ఈ నగరాల్లోనే అధికంగా జరుగుతున్నాయి.