Luxury Houses - Hyderabad: విలాసవంతమైన ఫ్లాట్లకు గిరాకీ

7 ప్రధాన నగరాల్లో 2.5 రెట్ల విక్రయాలు
హైదరాబాద్‌లో 8 రెట్ల అమ్మకాలు
మార్చి త్రైమాసికంపై సీబీఆర్‌ఈ నివేదిక

దిల్లీ: జనవరి-మార్చి త్రైమాసికంలో విలాసవంత నివాస గృహాల అమ్మకాలు రాణించాయి. ప్రధాన 7 నగరాల్లో రూ.4 కోట్లు అంతకు మించి విలువైన  విలాస గృహాల విక్రయాలు దాదాపు 2.5 రెట్ల మేర పెరిగి 4,400కు చేరాయని స్థిరాస్తి కన్సల్టెంట్‌ సంస్థ సీబీఆర్‌ఈ విడుదల చేసిన నివేదిక పేర్కొంది. ఏడాది కిందట ఈ విభాగంలో 1600 ఇళ్లు మాత్రమే అమ్ముడుపోయాయి. ఈ నివేదిక ప్రకారం..

* సమీక్షిస్తున్న త్రైమాసికంలో దిల్లీ-ఎన్‌సీఆర్‌లో 1900 విలాస గృహాలు విక్రయమయ్యాయి. అంతక్రితం ఏడాది జనవరి-మార్చిలో అమ్ముడైన 600తో పోలిస్తే ఇవి మూడింతలకు పైమాటే.

* ముంబయిలో 800 నుంచి 1500కు; కోల్‌కతాలో 50 నుంచి 100కు; చెన్నైలో 50 నుంచి 250, పుణెలో 10 నుంచి 150కి అమ్మకాలు పెరగ్గా.. బెంగళూరులో పెద్దగా మార్పు లేకుండా 50 విలాస ఇళ్ల విక్రయాలు నమోదయ్యాయి.

* ఇక హైదరాబాద్‌లో 50 నుంచి 430కు అంటే 8 రెట్ల మేర విలాసవంత గృహాలు అమ్ముడయ్యాయి.

‘2022లోనూ బలమైన అమ్మకాలు కనిపించిన ఈ విభాగంలో అదే ధోరణి కొనసాగింది. కరోనా అనంతరం కొనుగోలుదార్ల ధోరణిలో మార్పు వచ్చింది. దీంతో మెరుగైన సదుపాయాలుండే విలాసవంతమైన ఇళ్ల వైపు దృష్టి సారించార’ని సీబీఆర్‌ఈ ఇండియా సీఈఓ అన్షుమాన్‌ మ్యాగజైన్‌ పేర్కొన్నారు. వచ్చే కొద్ది త్రైమాసికాల పాటు ఈ ధోరణి కొనసాగొచ్చని ఆయన అంచనా వేశారు. జనవరి-మార్చి 2023లో ఈ 7 నగరాల్లో మొత్తం 78,700 ఇళ్లు విక్రయమయ్యాయి. అంతక్రితం ఏడాది ఇదే సమయంలోనూ 70,500 గృహాలు అమ్ముడుపోయాయి.