Credit card: క్రెడిట్‌ కార్డుతో బీమా రుణాలు చెల్లించలేరు!

దిల్లీ: జీవితబీమా పాలసీల ఆధారంగా తీసుకునే రుణాలను క్రెడిట్‌కార్డులతో చెల్లించకుండా బీమా నియంత్రణ సంస్థ ఐఆర్‌డీఏఐ తీసుకొచ్చిన ఆదేశాల వల్ల, పాలసీదారులు రుణాల ఊబిలో చిక్కుకోకుండా ఉంటారని బీమా సంస్థల ఉన్నతాధికారులు పేర్కొన్నారు. ప్రతి ఒక్కరికి ఆర్థిక క్రమశిక్షణ అనేది ముఖ్యమని, రుణాలను క్రెడిట్‌కార్డుతో చెల్లించకుండా చూడాల్సిన ఆవశ్యకత ఉందని పేర్కొన్నారు. ఒకవేళ క్రెడిట్‌కార్డు నుంచి తీసుకున్న మొత్తాన్ని చెల్లించలేకపోతే అధిక వడ్డీలను సదరు కంపెనీలు విధిస్తాయని గుర్తు చేశారు. వ్యక్తిగత, పూచీకత్తు లేని రుణాలపై విధించే వడ్డీరేట్లతో పోలిస్తే, జీవితబీమా పాలసీ ఆధారిత రుణరేట్లు చాలా తక్కువగా 8-15 శాతంగా ఉంటాయని కోటక్‌ మహీంద్రా లైఫ్‌ ఇన్సూరెన్స్‌ చీఫ్‌ రిస్క్‌ ఆఫీసర్‌ సునీల్‌ శర్మ తెలిపారు. అదే క్రెడిట్‌కార్డు రేట్లు చూస్తే 20% పైనే ఉంటాయని గుర్తు చేశారు.