Hero Motocorp: హీరో నుంచి రికార్డు స్థాయిలో కొత్త బైకులు

దిల్లీ: ప్రస్తుత ఆర్థిక సంవత్సరంలో రికార్డు స్థాయిలో కొత్త బైకులను తీసుకొచ్చేందుకు హీరో మోటోకార్ప్‌ సిద్ధమవుతోంది. మార్కెట్‌ వాటాలో ఆధిపత్యం కొనసాగించడంతో పాటు ప్రీమియం బైకు విభాగంలో బలోపేతం కావాలని చూస్తున్నట్లు కంపెనీ సీఈఓ నిరంజన్‌ గుప్తా తెలిపారు. హీరో మోటోకార్ప్‌- హార్లే డేవిడ్‌సన్‌ భాగస్వామ్యంలో మొట్టమొదటి ఉత్పత్తిని కూడా ఈ ఆర్థికంలోనే విడుదల చేయడానికి హీరో సన్నాహాలు చేస్తోంది. 100-110 సీసీ బైకుల విభాగంలో అగ్రస్థానంలో ఉన్న కంపెనీ 125 సీసీలోనూ బలపడటానికి చూస్తోంది. 160సీసీ, ఆపైన విభాగాల్లో అమ్మకాలు పెంచుకునేందుకు కొత్త మోడళ్లు తీసుకురానుంది. భవిష్యత్‌ అవకాశాలపై కంపెనీ బుల్లిష్‌గా ఉందని, అన్ని విభాగాల్లో మార్కెట్‌ వాటా పెంచుకునేందుకు ప్రణాళికలు ఉన్నాయని అనలిస్ట్‌ కాల్‌లో గుప్తా వెల్లడించారు. ప్రతి త్రైమాసికంలోనూ కొత్త మోడళ్లు తీసుకొస్తామని, ముఖ్యంగా 150సీసీ నుంచి 450 సీసీ మధ్య ప్రీమియం విభాగంలో ఎక్కువ విడుదలలు ఉంటాయని వివరించారు. మొత్తం మోటార్‌సైకిల్‌ విభాగంలో ప్రస్తుతం హీరో మోటోకార్ప్‌కు దాదాపు 51 శాతం మార్కెట్‌ వాటా ఉంది.