LIC: ఏడాదిలో ఎల్‌ఐసీ షేరుకు 40% నష్టం

లైఫ్‌ ఇన్సూరెన్స్‌ కార్పొరేషన్‌ ఆఫ్‌ ఇండియా (ఎల్‌ఐసీ) షేరు స్టాక్‌ ఎక్స్ఛేంజీల్లో అరంగేట్రం చేసి బుధవారానికి (మే 17) ఏడాది నిండింది. ఇష్యూ ధర రూ.949తో పోలిస్తే ఇప్పటివరకు 40% నష్టపోయి.. రూ.570 వద్ద ఈ షేరు ట్రేడవుతోంది. ఫలితంగా మదుపర్ల సంపద రూ.1.93 లక్షల కోట్ల మేర ఆవిరైంది. ఈ ఏడాది కాలంలో ఎల్‌ఐసీ షేరు ఒక్కసారి కూడా ఇష్యూ ధరకు చేరలేదు. రూ.920 వద్ద 52 వారాల గరిష్ఠాన్ని, రూ.530.20 వద్ద కనిష్ఠాన్ని నమోదుచేసింది. ఇదే సమయంలో సెన్సెక్స్‌ 7,242 పాయింట్లు, నిఫ్టీ 1,922 పాయింట్లు పెరిగాయి. నమోదు రోజు రూ.5.54 లక్షల కోట్ల మార్కెట్‌ విలువతో.. దేశీయంగా అగ్రగామి 5 విలువైన కంపెనీల్లో ఒకటిగా ఎల్‌ఐసీ నిలిచింది. ప్రస్తుతం రూ.3.60 లక్షల కోట్ల మార్కెట్‌ విలువతో 13వ స్థానంలో ఉంది.