ఏప్రిల్‌లో దేశీయ విమాన ప్రయాణికులు 1.29 కోట్లు

ముంబయి: గత నెలలో (ఏప్రిల్‌) దేశీయ విమానాల్లో 1.29 కోట్ల మంది ప్రయాణించారు. 2022 ఏప్రిల్‌లో ప్రయాణించిన 1.05 కోట్ల మందితో పోలిస్తే, ఈ సంఖ్య 22% అధికమని డైరెక్టరేట్‌ జనరల్‌ ఆఫ్‌ సివిల్‌ ఏవియేషన్‌ (డీజీసీఏ) తెలిపింది. ఈ ఏడాది మార్చిలో ప్రయాణించిన 1.28 కోట్ల మందితో పోలిస్తే.. ఏప్రిల్‌లో స్వల్పంగా తగ్గారు.

ఇండిగో వాటా 57.5%: విమాన ప్రయాణికులను చేరవేయడంలో మార్చితో పోలిస్తే ఏప్రిల్‌లో, ఇండిగో మార్కెట్‌ వాటా 56.8% నుంచి 57.5 శాతానికి పెరిగింది. ఎయిరిండియా మార్కెట్‌ వాటా 8.8% నుంచి 8.6 శాతానికి తగ్గింది. విస్తారా వాటా 8.9% నుంచి 8.7 శాతానికి, స్పైస్‌జెట్‌ వాటా 6.4% నుంచి 5.8 శాతానికి, గోఫస్ట్‌ వాటా 6.9% నుంచి 6.4 శాతానికి తగ్గింది. ఎయిరేషియా ఇండియా (ప్రస్తుతం ఏఐఎక్స్‌ కనెక్ట్‌) మార్కెట్‌ వాటా ఎలాంటి మార్పు లేకుండా 7.6 శాతంగానే ఉంది. ఆకాశ ఎయిర్‌ మార్కెట్‌ వాటా 3.3% నుంచి 4 శాతానికి పెరిగింది.

సమయపాలనలో: ఆకాశ ఎయిర్‌ అగ్రస్థానంలో ఉంది. ఈ సంస్థ విమానాలు 94% నిర్ణీత సమయంలో రాకపోకలు సాగించాయి. ఆ తర్వాతి స్థానాల్లో ఎయిరిండియా (91.1%), ఇండిగో (89.6%) ఉన్నాయి. ఈ నెల 3 నుంచి విమానాలను రద్దు చేసుకున్న గోఫస్ట్‌ సమయ పాలన అత్యంత తక్కువగా 41.7 శాతంగా నమోదైంది.

* ఈ ఏడాది జనవరి- ఏప్రిల్‌లో దేశీయ విమానాల్లో మొత్తం 5.04 కోట్ల మంది ప్రయాణించారు. కిందటేడాది ఇదే సమయంలో ఈ సంఖ్య 3.53 కోట్లుగా ఉందని డీజీసీఏ తెలిపింది. అంటే 42.88% వార్షిక వృద్ధి ఉంది.