ఈ ఏడాది చివరికల్లా ఓలా ఎలక్ట్రిక్‌ ఐపీఓ!

దిల్లీ: విద్యుత్తు స్కూటర్ల తయారీ సంస్థ ఓలా ఎలక్ట్రిక్‌ ఈ ఏడాది చివరి కల్లా స్టాక్‌ ఎక్స్ఛేంజీల్లో నమోదు కావాలని భావిస్తోంది. ఇందుకవసరమైన ప్రక్రియ కోసం గోల్డ్‌మ్యాన్‌ శాక్స్‌, కోటక్‌లను ఇన్వెస్ట్‌మెంట్‌ బ్యాంకర్లుగా నియమించుకుందని ఒక ఆంగ్ల వార్తా సంస్థ తెలిపింది. సాఫ్ట్‌బ్యాంక్‌ గ్రూప్‌ కార్ప్‌, టైగర్‌ గ్లోబల్‌ మేనేజ్‌మెంట్‌ వంటి సంస్థలు ఈ కంపెనీకి మద్దతుగా ఉన్నాయి. గతేడాది నిధుల సమీకరణ సమయంలో ఓలా ఎలక్ట్రిక్‌ కంపెనీ విలువను 5 బిలియన్‌ డాలర్లు (సుమారు రూ.41,000 కోట్లు)గా లెక్కగట్టారు. అయితే మరింత విలువను కంపెనీ కోరుకుంటోంది. ఐపీఓ ద్వారా ఎంత మేర నిధులను సమీకరించాలనుకుంటుందో కూడా ఇంకా తెలియరాలేదు. ఒక వేళ కంపెనీ  10 శాతం వాటాను విక్రయించినా, ఈ ఏడాది అతిపెద్ద ఐపీఓ ఇదే అవుతుంది. ఈ కంపెనీ ఏప్రిల్‌లో ఇప్పటిదాకా అత్యధిక నెలవారీ విక్రయాలు (30,000 వాహనాలు) సాధించింది. విద్యుత్తు బ్యాటరీతో నడిచే మోటార్‌ సైకిళ్లు,  కారును కూడా తీసుకువచ్చే ప్రణాళికల్లోనూ కంపెనీ ఉంది.