Bank Account: బ్యాంకు ఖాతాలో రూ.456 ఉన్నాయా?

ఈనాడు, హైదరాబాద్‌: మీ బ్యాంకు ఖాతాలో రూ.456 ఉన్నాయా? ఎందుకు అనుకుంటున్నారా? చాలామంది ప్రధాన మంత్రి జీవన్‌ జ్యోతి బీమా యోజన (పీఎంజేజేబీవై), ప్రధానమంత్రి సురక్ష బీమా యోజన (పీఎంఎస్‌బీవై) పాలసీలు తీసుకున్నారు. ఇప్పుడు ఈ బీమా పాలసీలకు ప్రీమియం చెల్లించే తరుణం వచ్చింది. బ్యాంకులు నేరుగా మీ ఖాతా నుంచి ఈ ప్రీమియాన్ని డెబిట్‌ చేసుకుంటాయి. ఈ నెల 31లోగా ఎప్పుడైనా సరే ప్రీమియాన్ని వసూలు చేస్తామని బ్యాంకులు ఇప్పటికే ఖాతాదారులకు సందేశాలు పంపిస్తున్నాయి.

అందరినీ బీమా పరిధిలోకి తీసుకురావాలన్న లక్ష్యంతో కేంద్రం తీసుకొచ్చిన బీమా పథకాలే పీఎంజేజేబీవై, పీఎంఎస్‌బీవై. తక్కువ ఆదాయ వర్గాలకు ఎంతో ఉపయోగకరంగా ఉండేలా ఈ పాలసీలను ప్రభుత్వం అందుబాటులోకి తెచ్చింది. బ్యాంకు పొదుపు ఖాతాకు అనుబంధంగా ఈ పాలసీలను తీసుకునేందుకు వీలుంటుంది.

పీఎంఎస్‌బీవై: వ్యక్తిగత ప్రమాద బీమా తరహా పాలసీ ఇది. ప్రమాదవశాత్తు మరణం, శాశ్వత వైకల్యం సంభవిస్తే రూ.2లక్షల పరిహారం ఇచ్చేలా ఈ పాలసీని రూపొందించారు. దీనికి రూ.20 ప్రీమియం చెల్లించాలి. 18-70 ఏళ్లలోపు వారికి ఈ పాలసీ వర్తిస్తుంది.

పీఎంజేజేబీవై: జీవిత బీమా పాలసీ ఇది. పాలసీదారుడు వయసు 18-50 ఏళ్ల మధ్య ఉండాలి. ప్రీమియం రూ.436. పాలసీదారుడు మరణించినప్పుడు నామినీకి రూ.2లక్షల పరిహారం అందుతుంది. పాలసీదారుడి వయస్సు 50 ఏళ్లు దాటినా మరో 5 ఏళ్లపాటు ప్రీమియం చెల్లింపును పొడిగించుకునే అవకాశం ఉంది.