చైనా తయారీ విమాన ప్రయాణం షురూ

బీజింగ్‌/షాంఘై: చైనా సొంతంగా తయారు చేసిన ప్రయాణికుల విమానం సీ919 ఆదివారం  మొదటిసారిగా వాణిజ్య కార్యకలాపాలను విజయవంతంగా పూర్తిచేసింది. ఫలితంగా పౌర విమానయాన తయారీ విపణిలోకి చైనా అధికారికంగా అడుగుపెట్టింది. బోయింగ్‌, ఎయిర్‌బస్‌ వంటి సంస్థలకు పోటీగా సొంతంగా విమానాలను తీసుకురావాలన్న లక్ష్యంలో భాగంగా, చైనా ఈ విమాన తయారీని చేపట్టింది. సీ919తో తొలి వాణిజ్య సర్వీసును షాంఘై నుంచి బీజింగ్‌ మధ్య ప్రభుత్వ రంగ విమానయాన సంస్థ చైనా ఈస్టర్న్‌ ఎయిర్‌లైన్స్‌ నడిపింది. 128 మంది ఇందులో ప్రయాణించారు. రెండు ఇంజిన్లు కలిగిన ఈ విమానంలో 164 సీట్లు ఉంటాయి. రెండు గంటల ఇరవై అయిదు నిమిషాల్లో ఈ విమానం షాంఘై నుంచి బీజింగ్‌ చేరుకుంది. బీజింగ్‌ అంతర్జాతీయ విమానాశ్రయానికి సీ919 చేరగానే విమానం, సిబ్బంది, ప్రయాణికులకు వాటర్‌ సెల్యూట్‌ కార్యక్రమంతో స్వాగతం పలికారు. అంతర్జాతీయ విమాన ప్రమాణాలు, సొంత మేధో సంపత్తి హక్కులతో చైనా సీ919 విమానాన్ని రూపొందించింది. కమర్షియల్‌ ఎయిర్‌క్రాఫ్ట్‌ కార్పొరేషన్‌ ఆఫ్‌ చైనా ఈ విమానాన్ని అభివృద్ధి చేయగా.. గత ఏడాది సెప్టెంబరులో సివిల్‌ ఏవియేషన్‌ అడ్మినిస్ట్రేషన్‌ ఆఫ్‌ చైనా ధ్రువీకరణ పత్రాన్ని మంజూరు చేసింది. ఒకసారి ఇంధనం నింపితే 5,555 కి.మీ దూరం వరకు ప్రయాణించేలా తీర్చిదిద్దిన ఈ విమానంతో.. ఎయిర్‌బస్‌, బోయింగ్‌లతో పోటీపడాలన్నది చైనా ప్రణాళిక. దేశీయ, ప్రాంతీయ అంతర్జాతీయ విమానాల్లో ఎక్కువగా వినియోగించే ఏ320, బీ737 విమానాలకు సీ919  పోటీదారుగా మారొచ్చని పరిశ్రమ వర్గాలు భావిస్తున్నాయి.