బేరింగ్‌ పీఈ చేతికి హెచ్‌డీఎఫ్‌సీ క్రెడిల్లా?

90 శాతం వాటా కొనుగోలు చేసే యోచన

దిల్లీ: హెచ్‌డీఎఫ్‌సీకి చెందిన విద్యా రుణాల సంస్థ ‘హెచ్‌డీఎఫ్‌సీ క్రెడిల్లా’లో మెజార్టీ వాటాను హాంకాంగ్‌ కేంద్రంగా కార్యకలాపాలు సాగించే బేరింగ్‌ ప్రైవేట్‌ ఈక్విటీ సంస్థ కొనుగోలు చేయనుందని తెలుస్తోంది. దాదాపు 1.3 బిలియన్‌ డాలర్ల (రూ.10,000 కోట్ల) సంస్థాగత విలువకు ఈ లావాదేవీ జరిగే అవకాశం ఉందని సమాచారం. మార్కెట్‌ వర్గాల్లో ప్రచారంలో ఉన్న అంశాల ప్రకారం, హెచ్‌డీఎఫ్‌సీ  క్రెడిల్లాలో 90% వాటాను, హెచ్‌డీఎఫ్‌సీ లిమిటెడ్‌ నుంచి బేరింగ్‌ పీఈ కొనుగోలు చేస్తుంది. మిగిలిన 10%  వాటా హెచ్‌డీఎఫ్‌సీ లిమిటెడ్‌ వద్ద ఉంటుంది. వచ్చే రెండేళ్లలో దశల వారీగా ఈ 10% వాటాను కూడా విక్రయించాలనేది హెచ్‌డీఎఫ్‌సీ లిమిటెడ్‌ ఆలోచనగా తెలుస్తోంది. హెచ్‌డీఎఫ్‌సీ లిమిటెడ్‌ త్వరలోనే హెచ్‌డీఎఫ్‌సీ బ్యాంకులో విలీనం కాబోతున్న విషయం విదితమే. ఈ విలీనానికి ముందే హెచ్‌డీఎఫ్‌సీ క్రెడిల్లాలో వాటాల విక్రయం పూర్తవుతుందని అంటున్నారు. కేవలం విద్యా రుణాలు ఇచ్చే ప్రైవేటు రంగ బ్యాంకింగేతర ఆర్థిక సంస్థ (ఎన్‌బీఎఫ్‌సీ)ల్లో హెచ్‌డీఎఫ్‌సీ క్రెడిల్లా అగ్రగామిగా ఉంది. ప్రధానంగా విదేశాలకు ఉన్నత విద్య కోసం వెళ్లే విద్యార్థులకు ఈ సంస్థ అధికంగా రుణాలు ఇస్తోంది.

విజయ డయాగ్నొస్టిక్‌ లాభం రూ.27 కోట్లు

హైదరాబాద్‌: రోగ నిర్థారణ సేవల సంస్థ విజయ డయాగ్నొస్టిక్‌ సెంటర్‌, మార్చి త్రైమాసికానికి రూ.26.92 కోట్ల స్టాండలోన్‌ నికరలాభాన్ని ప్రకటించింది. 2021-22 ఇదే కాల లాభం రూ.23.71 కోట్లే. ఇదే సమయంలో మొత్తం ఆదాయం రూ.117.05 కోట్ల నుంచి రూ.122.86 కోట్లకు పెరిగింది. 2022-23 పూర్తి ఆర్థిక సంవత్సరానికి రూ.464.15 కోట్ల ఆదాయంపై రూ.83.23 కోట్ల నికరలాభాన్ని సంస్థ నమోదు చేసింది. 2021-22లో రూ.463.79 కోట్ల ఆదాయంపై రూ.108.29 కోట్ల నికరలాభాన్ని సంస్థ ఆర్జించింది. 1 రూపాయి ముఖ విలువ కలిగిన ప్రతి షేరుకు రూ.1 డివిడెండును డైరెక్టర్ల బోర్డు సిఫారసు చేసింది.

50% స్మార్ట్‌ఫోన్‌ విడిభాగాలు స్థానికంగా సమీకరిస్తాం: షియామీ

దిల్లీ: విలువపరంగా స్మార్ట్‌ఫోన్‌లో వినియోగించే 50 శాతం విడిభాగాలను భారత్‌ నుంచే సమీకరించడం 2025కు సాకారమవుతుందని షియామీ ఇండియా అధ్యక్షుడు బి.మురళికృష్ణన్‌ వెల్లడించారు. కంపెనీ తాజాగా హియరబుల్స్‌ విభాగంలోకి అడుగుపెట్టామని, నోయిడాలో ఆప్టిమస్‌ ఎలక్ట్రానిక్స్‌ ఫ్యాక్టరీలో వీటిని ఉత్పత్తి చేయనున్నట్లు పేర్కొన్నారు.  ఈ ఏడాది చివరకు స్మార్ట్‌ఫోన్‌ తెరలు, ఫింగర్‌ప్రింట్‌ సెన్సర్‌లను కూడా స్థానికంగానే సమీకరించడంపై పనిచేస్తున్నట్లు వివరించారు. 5జీ ఫోన్లను రూ.10,000-15,000 శ్రేణిలో ఆవిష్కరిస్తే, విక్రయావకాశాలు బాగుంటాయనే విశ్వాసాన్ని వ్యక్తం చేశారు.