40-50 ఎఫ్‌డీఐ ప్రతిపాదనలకు అనుమతులింకా దక్కలేదు

మన సరిహద్దు దేశాలకు చెందినవే

దిల్లీ: మన దేశంతో సరిహద్దు పంచుకుంటున్న దేశాలకు సంబంధించిన దాదాపు 40-50 విదేశీ ప్రత్యక్ష పెట్టుబడుల (ఎఫ్‌డీఐ) ప్రతిపాదనలకు ఇంకా అనుమతులు దక్కలేదని అధికార వర్గాలు పేర్కొంటున్నాయి. ‘ప్రెస్‌ నోట్‌-3’ కింద మన దేశంతో సరిహద్దును పంచుకునే దేశాల నుంచి వచ్చే ఎఫ్‌డీఐలకు కేంద్రప్రభుత్వ ముందస్తు అనుమతులు తప్పనిసరి. ఆ దేశాల జాబితాలో చైనా, బంగ్లాదేశ్‌, పాకిస్థాన్‌, భూటాన్‌, నేపాల్‌, మయన్మార్‌, ఆఫ్ఘనిస్థాన్‌ ఉన్నాయి. ‘ఈ దేశాల నుంచి వచ్చే ఎఫ్‌డీఐలపై పూర్తి నిషేధం ఏమీ లేదు. కేవలం ప్రభుత్వ అనుమతుల మార్గంలోనే ఆయా దేశాల పెట్టుబడిదార్లు ఇక్కడకు రావాల్సి ఉంటుంది. ఈ అనుమతుల ప్రక్రియకు కొంత సమయం పట్టొచ్చ’ని ప్రభుత్వ వర్గాలు చెబుతున్నాయి. వీరి ప్రతిపాదనలకు 3 నెలల్లో అనుమతులు రావాల్సి ఉన్నా.. ఇప్పటికే 7 నెలలు అయింది. పరిశ్రమ వర్గాల సమాచారం ప్రకారం.. ఎమ్‌జీ మోటార్‌ (చైనాకు చెందిన ఎస్‌ఏఐసీ మోటార్‌ కార్ప్‌కు చెందిన బ్రిటిష్‌ బ్రాండ్‌) తన మాతృసంస్థ ద్వారా నిధుల సమీకరణ కోసం రెండేళ్ల నుంచీ ఎదురుచూస్తోంది. 2-4 ఏళ్లలో భారత పెట్టుబడిదార్లకు మెజారిటీ వాటా విక్రయించి, రూ.5000 కోట్లు సమీకరించాలని చూస్తున్నట్లు ఎమ్‌జీ మోటార్‌ ఇండియా ఇటీవలే ప్రకటించింది కూడా. కరోనా సమయంలో, తక్కువ విలువలకు దేశీయ కంపెనీలను బలవంతపు టేకోవర్‌ చేయకుండా ఉండడం కోసం ప్రెస్‌ నోట్‌-3ని 2020 ఏప్రిల్‌లో ప్రభుత్వం తీసుకొచ్చింది.